«Արցախպրես» լրատվական գործակալությունն այսօր՝ մայիսի 23-ին, նշում է իր հիմնադրման երեք ամյակը:
Արցախպրեսը դարձավ երեք տարեկան. շնորհավորում են հայտնի մարդիկ
ՍՏԵՓԱՆԱԿԵՐՏ, 23 մայիսի, ԱՐՑԱԽՊՐԵՍ: Օրվա առթիվ իրենց շնորհավորանքներն են հղել մշակույթի, սպորտի, մամուլի և քաղաքական ասպարեզների հայտնի դեմքեր:
ՀՀ վաստակավոր արտիստ Շուշան Պետրոսյան- Միշտ հետևել եմ «Արցախպրես»-ի նյութերին, բայց ստացվել է այնպես, որ ապրիլյան պատերազմական գործողություններից հետո այն դարձավ իմ ամենօրյա «Մեքքան», իմ բարի լույսը, որն իմ օրվա գույնն ու տրամադրությունն է որոշում։
Մաղթում եմ երկար, բարի ու հարատև կյանք։ Աստված առաջ: Հետայսու էլ ձեր բարի լուրերով, մշակութային ձեռքբերումներով, նորանոր հաղթանակներով միշտ շարունակեք վառ լույսով գունավորել մեր օրերը։
Լիբանանյան «Ազդակ» օրաթերթի գլխավոր խմբագիր Շահան Գանտահարյան - Շնորհավորում եմ «Արցապրես»-ի հիմնադրման երրորդ տարին։ Յուրաքանչյուր լրատվամիջոցի ծնունդ հայկական լրատվադաշտում բոլորիս համար գոտեպնդիչ է։ Արդեն երրորդ տարին է, ինչ «Արցախպրես»-ը պատվով իրականացնում է հայկական լրատվամիջոցից ակնկալված կարևորագույն գործառույթները և թարմ, արագ լրատվություններ է թողարկում՝ արցախյան մեր հայրենիքի քաղաքական, հոգևոր, մշակութային ոլորտների վերաբերյալ։ Ակներև է նաև այն, որ արցախյան լրատվությունները թողարկելու և մեկնաբանելու իր աշխատանքին առընթեր՝ «Արցախպրես»-ը իր նյութերում և, հատկապես, վերլուծություններում ներառել է սփյուռքյան հայացքները՝ այսպիսով նպաստելով լրատվական և մեկնաբանական նյութերի համակողմանի-համահայկական ներկայացման կարևոր աշխատանքին։
Բարի երթ եմ մաղթում մեր արցախյան գործընկերոջը՝ երիտասարդ լրատվամիջոցին, և մաղթում, որ նա Արցախի մասին միշտ հաղթանակի և խաղաղության լուրեր հաղորդի։
Սամբոյի աշխարհի կրկնակի չեմպիոն Աշոտ Դանիելյան - Նախ՝ շնորհավորում եմ «Արցախպրես»-ի երեք ամյակը: Ցանկանում եմ, որ Արցախի սպորտային կյանքի նվաճումների մասին հաճախ հրապարակումներ լինեն ձեր կայքում: Առանց ձեր լուսաբանման, աշխարհը չի իմանա մարզական կյանքում Արցախի մարզիկների հաջողությունների մասին: Շատ կարևոր առաքելություն եք անում, ինչի համար նորանոր ստեղծագործական հաջողություններ եմ մաղթում ձեզ:
ԱՀ Ազգային ժողովի անկախ պատգամավոր Արսեն Առստամյան- Շնորհավորում եմ «Արցախպրես» լրատվական անկախ գործակալության ողջ անձնակազմին՝ գործունեության եռամյակի առթիվ։ Կայացման ու զարգացման ձեռքբերումներ արձանագրելու տեսանկյունից երեք տարին կարճ ժամանակահատված է: Այդուհանդերձ, մեր երկրի լրատվական դաշտում «Արցախպրես»-ին հաջողվել է ունենալ իր ուրույն դերն ու ձեռագիրը։ Հատկապես գնահատման արժանի են ադրբեջանա-ղարաբաղյան հակամարտության թեմայով հրապարակումները, որոնց շնորհիվ այսօր ունենք թեմային առնչվող մի յուրօրինակ ու ինքնատիպ պահոց։ Անհատապես շնորհավորելով «Արցախպրես»-ի ողջ անձնակազմին՝ միաժամանակ ցանկանում եմ, որ միշտ հիշեք ու առաջնորդվեք նժդեհյան հետևյալ ճշմարտությամբ՝ պարտականություն ունեք խտացած ճշմարտություններ տալ ժողովրդին, նպատակ՝ այդ ճշմարտություններով լուսավորել նրան դեպի ապագան։
ԱՀ նախագահի խորհրդական Տիգրան Աբրահամյան- «Արցախպրես»-ն իր գործունեության 3-ամյա ժամանակահահատվածում կարևոր դերակատարություն է ունեցել Արցախի ներքին և արտաքին քաղաքականությանը վերաբերող տեղեկատվությունն արտաքին ու ներքին լսարանին փոխանցելու հարցում: Վստահ կարելի է ասել, որ գործակալությունը կայացման կարևոր փուլ է անցել և այսօր տեղեկատվական սպասարկում է իրականացնում ոչ միայն Արցախում ապրող մեր քաղաքացիների համար, այլ նաև կարևոր աղբյուր է Հայաստանի և արտաքին աշխարհի համար:
ԱՀ Մարդու իրավունքների պաշտպան Ռուբեն Մելիքյան - Ջերմորեն շնորհավորում եմ «Արցախպրես» լրատվական գործակալության անձնակազմին՝ հիմնադրման երրորդ տարեդարձի առթիվ։ Ձեր եռանդուն գործունեությունը մշտապես աչքի է ընկել պրոֆեսիոնալիզմով ու օպերատիվությամբ, ստեղծարարությամբ ու նորարարությամբ։ Սեփական օրինակով դուք ապացուցում եք, որ Արցախի քաղաքացիական հասարակությունն ունակ է նվաճել ու պահել բարձր նշաձող։ Մաղթում եմ ձեզ անսպառ եռանդ ու նորանոր նվաճումներ։
