Շուշի քաղաքում նոր աշխուժություն են առաջացրել վերջին տարիներին բացված նոր բուհերը՝ Հայաստանի ազգային ագրարային համալասարանի Շուշիի մասնաճյուղը, Տեխնոլոգիական համալսարանը և Եզնիկ Մոզյան արհեստագործական ուսումնարանը:
Մեծ աշխատանք է տարվում քաղաքային միջավայրը գրավիչ դարձնելու համար. Շուշիի քաղաքապետ
ՍՏԵՓԱՆԱԿԵՐՏ, 24 մայիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Շուշիի քաղաքապետ Արծվիկ Սարգսյանը և ավելացրել, որ մոսկվաբնակ բարերար, Շուշիի պատվավոր քաղաքացի Կարո Սարգսյանի հովանավորությամբ էլ շուտով կավարտվի Շուշիի մանկապատանեկան ստեղծագործական կենտրոնի շինարարությունը:
Քաղաքապետի խոսքով՝ Շուշին վերականգնելու և քաղաքային շունչը կրկին վերադարձնելու համար պետական ու բարեգործական միջոցներով մեծ աշխատանք է տարվում, ինչը շատ կարևոր է՝ քաղաքային միջավայրի ստեղծման և այն գրավիչ դարձնելու առումով:
««Հայաստան» համահայկական հիմնադրամի և պետբյուջեի համաֆինանսավորմամբ օրերս բացվել է Շուշիի մշակույթի և երիտասարդության կենտրոնը, ավարտման փուլում է երեխաների խնամքի պահպանման կենտրոնը: Շուտով Ստեփանակերտի երեխաների խնամքի կենտրոնը կտեղափոխվի Շուշի: Սեպտեմբերին շահագործման կհանձնվի 150 տեղանոց, ժամանակակից չափանիշներին համապատասխան նոր մանկապարտեզը»,- ասել է քաղաքապետը:
Խոսելով քաղաքի ջրամատակարարման և կոյուղու հարցերի մասին՝ Ա. Սարգսյանը նշել է, որ մոտ ժամանակներում ջրագծերը, կոյուղագծերը լրիվությամբ շահագործման կհանձնվեն:
«Ջրագծերի կառուցման վերջին՝ 3-րդ և 4-րդ փուլերի աշխատանքներն իրականացվում են «Հայաստան» համահայկական հիմնադրամի միջոցներով:Այսօր շուշեցիների շուրջ 80 տոկոսն ապահովված է մշտական ջրով: Այս տարի Շուշին ամբողջությամբ կապահովվի շուրջօրյա խմելու ջրով: Իսկ Իրանի Իսլամական հանրապետության հայկական համայնքի միջոցներով Շուշիում կտեղադրվի ջրի ֆիլտրման կայան»,- մանրամասնել է քաղաքապետը:
Անդրադառնալով շուշեցիների զբաղվածությանը՝ քաղաքապետն ասել է, որ Շուշիում դեռևս մեծ արտադրամասեր չկան. գործում է միայն «Ղարաբաղ կարպետ» ընկերության մասնաճյուղը, որտեղ աշխատում են շուրջ 40 կանայք:
Շուշեցիների հիմնական մասն ընդգրկված են պետական հիմնարկներում կամ բերդաքաղաքից մի քանի կիլոմետր հեռավորության վրա գտնվող մայրաքաղաք Ստեփանակերտում, որի հետ կանոնավոր տրանսպորտային կապ է գործում: Քաղաքապետի հավաստմամբ՝ այդ պատճառով Շուշիում գործազուրկերի թիվը մեծ չէ: