Քաշաթաղի շրջանում հացահատիկի բերքահավաքն սկսվեց հունիսի 5-ին:
Քաշաթաղի շրջանում գործում են հակահրդեհային հենակետեր
ՍՏԵՓԱՆԱԿԵՐՏ, 14 հունիսի, ԱՐՑԱԽՊՐԵՍ-ԱՐՄԵՆՊՐԵՍ: Մինչ այդ շրջանի հարավային Իշխանաձոր գյուղում կազմավորվել է հակահրդեհային շտաբ՝ բերքահավաքը ժամանակին և անկորուստ իրականացնելու նպատակով: Շտաբը ղեկավարում է շրջվարչակազմի ղեկավար Սուրեն Խաչատրյանը: «Հունիսի 13-ին աշխատանքային այցով Իշխանաձորում էի. զրուցեցի Ս. խաչատրյանի հետ: Ասաց՝ բերքահավաքն ընթանում է նորմալ հունով: Շտաբի պատասխանատու Ռ. Մաթևոսյանը տեղեկացրեց, որ այդ օրվա ընթացքում հնձվել է 300 հա գարու արտ, ստացվել է 810 տ բերք: Արտերում աշխատել է 35 կոմբայն:
ԱՀ արտակարգ իրավիճակների պետական ծառայության (ԱԻՊԾ) Քաշաթաղի շրջանի արտակարգ իրավիճակների բաժնի (ՇԱԻԲ) պետ, փոխգնդապետ Քերոբ Մովսեսյանի հետ այցելեցի Թովմասարի տարածք, որտեղ մոտ 8000 հա հացահատիկի ցանքս է կատարվել։ Այս մասում տեղակայված է 2 հակահրդեհային հենակետ՝ մեկ հրշեջ մեքենայով և հերկ կատարող տրակտորով; Առաջին հենակետում արդեն 8-րդ օրն է, ինչ հերթափոխ են իրականացնում ՇԱԻԲ հրշեջ-փրկարար մասին (ՀՓՄ) կից Տիգրանավանի ջոկի հրշեջ-փրկարարները՝ կապիտան Միքայել Կնյազյանի հրամանատարությամբ: Մ. Կնյազյանը կարևորեց այն, որ համագործակցում են տարածքի համայնքներում ձևավորված հրշեջ-կամավորական ջոկատների հետ, միասին իրականացնում են շուրջօրյա հերթափոխություն:
Հաջորդ հենակետը, որ այցելեցինք, գտնվում է Թովմասարի հյուսիսային մասում՝ այստեղ հայտնի Պաղ աղբյուրի մոտ: ՇԱԻԲ ՀՓՄ-ին կից Բերձորի առաջին պահակային խմբի հրշեջներն են հերթափոխ իրականացնում՝ պետ, լեյտենանտ Արսեն Մովսեսյանի գլխավորությամբ: Այս հենակետում նույնպես տեղեկացրեցին, որ ծառայությունն ընթանում է նորմալ հունով:
Կովսականի բարձրավանդակում տեղակայված հենակետում հերթափոխություն է իրականացվում ՇԱԻԲ ՀՓՄ-ին կից Կովսականի ջոկի կողմից՝ հրամանատար՝ կապիտան Արմեն Սարգսյան: Այս տարածքում հունձը նոր է սկսվել, սակայն ցանկացած պահի տղաները պետք է պատրաստ լինեն: Իհարկե՝ մինչ հնձի աշխատանքների սկսելը՝ բոլոր ցանքատարածքներում կատարվել են հակահրդեհային մի շարք աշխատանքներ՝ արտեզրերի հերկ, միջդաշտային ճանապարհների բարեկարգում, պայքար փշաթփերի դեմ և այլն, սակայն հասունացած արտերում պետք է շատ զգույշ գործել: Վերադարձին Ք.Մովսեսյանը տեղեկացրեց, որ մոտակա օրերին ևս 2 հենակետ կստեղծվի Որոտան քաղաքից հյուսիս՝ Որոտան գետի աջափնյա սարահարթում և ավելի հյուսիս՝ Սյունիքի մարզի Խնձորեսկ գյուղից հարավ-արևելք՝ Վանոցա գյուղի տարածքում:
Մի քանի օրից հնձի աշխատանքները կիրականացվեն բոլոր ցանքատարածքներում, կաշխատեն կրկնակի քանակով կոմբայններ ու այլ տեխնիկական միջոցներ: Հուսանք՝ բերքահավաքը կավարտվի ժամանակին, անկորուստ և ամենակարևորը՝ անփորձանք»:
