Այսօր Ստեփանակերտում՝ Արցախ թաղամասի հարևանությամբ, ԼՂՀ ՊԲ գլխավոր շտաբի նախկին պետ, գեներալ- լեյտենանտ, ԼՂՀ «Մարտական խաչ» առաջին աստիճանի շքանշանի ասպետ Անատոլի Զինևիչի անունը կրող փողոցում բացվել է նրա կիսանդրիի բացման հանդիսավոր արարողությունը։
Ստեփանակերտում բացվել է Անատոլի Զինևիչի կիսանդրին
ՍՏԵՓԱՆԱԿԵՐՏ, 23 ՀՈԿՏԵՄԲԵՐԻ, ԱՐՑԱԽՊՐԵՍ:Միջոցառմանը ներկա էին ԼՂՀ նախագահ Բակո Սահակյանը, Հայ Առաքելական Եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը, Ազգային ժողովի նախագահ Աշոտ Ղուլյանը, պաշտպանության նախարար, ՊԲ հրամանատար գեներալ- լեյտենանտ Մովսես Հակոբյանը, բարձրաստիճան պաշտոնատար անձինք ու զինվորականներ, դպրոցականներ, ռուսական համայնքի ներակայացուցիչներ, ովքեր ծաղիկներ ու ծաղկեպսակ են դրել հուշարձանի պատվանդանին՝ հարգանքի տուրք մատուցելով արցախյան ազատամարտի նվիրյալ զորահրամանատարի հիշատակին:
Նախագահ Սահակյանը կարեւորել է Անատոլի Զինեւիչի ներդրումը մեր հաղթանակների կերտման, պաշտպանության բանակի ստեղծման ու կայացման գործում: Երկրի ղեկավարի խոսքով` մայրաքաղաքի Զինեւիչի անունը կրող փողոցում զորավարի հուշարձանի տեղադրումը նրա հիշատակը վառ պահելու լավագույն միջոցներից է:
Արարողությանը հավուր պատշաճի ներկայացվել է Անատոլի Զինևիչի կենսագրությունն ու Արցախի ազատագրական պայքարում ունեցած մեծ ներդրումը: Զորահրամանատարի զինակից ընկերները նրան բնութագրել են որպես արդարության մարտիկի, ճշմարիտ սկզբունքներ ունեցող ամուր կամքի տեր զինվորականի, ով բարձր էր գնահատում հայ ժողովրդի մղած ազատագրական պայքարը: Հուշարձանի բացման պատիվը տրվել է ԼՂՀ ռազմական գերատեսչության ղեկավար Մովսես Հակոբյանին և Արցախի ռուսական համայնքի նախագահ Գալինա Սոմովային:
Այնուհետև օրհնանքի ու գնահատանքի խոսք է ասել Պարգև արքեպիսկոպոս Մարտիրոսյանը՝ հուշարձանը համարելով հայ ժողովրդի երախտագիտության արտահայտություն իր մեծ բարեկամին: Հուշարձանի բացման առթիվ Արցախի ժողովրդին և իշխանություններին ուղղված երախտիքի խոսք է ասել նաև Գալինա Սոմովան: Ա. Զինևիչի կյանքին ու մարտական ուղուն նվիրված գրական-գեղարվեստական ծրագրով հանդես եկան մայրաքաղաքի N1 դպրոցի աշակերտները: Միջոցառումը եզրափակվել է ԼՂՀ ՊԲ պատվո պահակախմբի հանդիսավոր շքերթով: Նշենք նաև, որ երջանկահիշատակ զորավարի հուշարձանը կերտել է արցախցի անվանի քանդակագործ Ալբերտ Հարությունյանը:
Անատոլի Վլադիմիրովիչ Զինևիչը ծնվել է 1932թ. նոյեմբերի 20-ին, Ուկրաինայի Պրոսկուրով քաղաքում: Ավարտել է ԽՍՀՄ ԶՈՒ Պրոսկուրովի տանկային ուսումնարանը (1953), Մոսկվայի Ֆրունզեի անվան ռազմական ակադեմիան (1972) և բարձրագույն ղեկավար կազմի ակադեմիական դասընթացները (1975)։ 1953-75–ին ծառայել է ԽՍՀՄ ԶՈՒ Հեռավորարևելյան և Լենինգրադի զինվորական շրջաններում։ 1975-78-ին՝ ռազմական խորհրդական Սոմալիում և Եթովպիայում, 1980-87-ին՝ Աֆղանստանում տեղակայված ԽՍՀՄ 47-րդ բանակի օպերատիվ վարչության պետի տեղակալ, 1987-90-ին՝ ՀԽՍՀ-ում տեղակայված 7-րդ բանակի օպերատիվ բաժնի պետ։ 1992-ին՝ ՀՀ պաշտպանության նախարարի խորհրդական, 1992-97-ին՝ ԼՂՀ ՊԲ գլխավոր շտաբի պետ:
Մահացել է 2000թ-ի օգոստոս 1-ին՝ Երևանում. աճյունը հանգչում է Ռուսաստանի Կովրով քաղաքում: