2016 թվականին Հայաստանի պետբյուջեն Եվրամիությունից շուրջ 27.5 մլն եվրո է ստացել։
2016թ. Հայաստանը Եվրամիությունից 27.5 մլն եվրո է ստացել
ՍՏԵՓԱՆԱԿԵՐՏ, 29 հունիսի, ԱՐՑԱԽՊՐԵՍ: Այս մասին հունիսի 29-ին հայտարարեց ՀՀ ԱԳ փոխնախարար Շավարշ Քոչարյանը՝ ելույթ ունենալով 2016 թվականի պետբյուջեի կատարողականի հաշվետվության քննարկումներում։
Նրա խոսքով՝ ակտիվ էր ոչ միայն տեխնիկական օգնությունը, այլեւ քաղաքական օրակարգը։ Բանակցություններ են ընթացել Հայաստան-Եվրամիություն նոր շրջանակային համաձայնագրի շուրջ, որոնք հաջողությամբ ավարտվեցին 2017 թվականի սկզբին։ 2016 թվականի ընթացքում Երեւան են ժամանել բարձր մակարդակի մի շարք եվրոպական պատվիրակություններ, այդ թվում՝ ԵՄ արտաքին քաղաքականության հանձնակատար, Եվրահանձնաժողովի փոխնախագահ Ֆեդերիկա Մոգերինին։
2017 թվականի հունվարին Հայաստանը դարձավ COSME ծրագրի մասնակիցը, որը կօգնի բարձրացնել մանր ու միջին բիզնեսի մրցունակությունը։ Հայաստանը մասնակցում է նաեւ եվրոպական մեկ այլ կարեւոր ծրագրի՝ Horizon-2020-ին, որն աջակցում է գիտական մշակումներին ու նախագծերին։
Վերջապես, 2017 թվականի սկզբին Երեւանն ու Բրյուսելը սկսեցին բանակցություններ վարել միասնական ավիաուղու շուրջ։ «Բանակցությունները հաջողությամբ են ընթանում»,- հավելեց Քոչարյանը։