«Ապրելու բանաձև» պատմավավերագրական մատենաշարի հատորներից յուրաքանչյուրում հավաքել ու ներկայացրել եմ Արցախյան ազատամարտում անմահացած քաջորդիների կյանքն ու նրանց սխրանքի պատմությունները:
«Ապրելու բանաձև» մատենաշարի 10-րդ հատորը պատմում է քառօրյա պատերազմի հերոսների մասին
ՍՏԵՓԱՆԱԿԵՐՏ, 20 հուլիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է հրապարակախոս Գոհար Մարտիկյանը՝ տեղեկացնելով, որ արդեն լույս է տեսել իր «Ապրելու բանաձև» պատմավավերագրական մատենաշարի 10-րդ հատորը:
««Ապրելու բանաձև» պատմավավերագրական մատենաշարի 10-րդ հատորը նվիրված է 2016 թվականի ապրիլյան քառօրյա պատերազմում զոհված տղաներին, ինչպես նաև Արցախյան պատերազմում զոհված Սիսիանի տարածաշրջանի հերոսներին։ Գրքում ներկայացված է ապրիլյան պատերազմում զոհված 73 հերոսի կյանքի ու սխրանքի պատմությունը։ Գնալով գյուղից գյուղ, մտնելով տնից տուն, հանդիպել եմ հերոս տղաների հարազատներին և յուրաքանչյուրից լսել իր տղայի նկարագիրը։ Գրքում ամբարված է ոչ թե լալու, այլ հպարտանալու պատմությունը: Այն պատմում է քառօրյա պատերազմի տղաների մասին՝ ներառելով ողջ հայոց պատմությունը, հայի տեսակի պատմությունը, ինչպիսին պետք է լինի հայը, որ աշխարհին համոզի ու ապացուցի, որ քաղաքակրթությունը մենք ներմուծեցինք աշխարհ, հիմա պատրաստվում ենք կայանալ այնպես, որ շարունակենք խաղաղ ապրելու քաղաքակրթությունը տարածել աշխարհում: Իսկ մեր տղաները պատրաստ են իրենց կյանքի գնով խաղաղություն ապահովել: Գրքերը տրվելու են զորամասերին, գրադարաններին, ուսումնական հաստատություններին»,-ավելացրել է Գ. Մարտիկյանը:
Հեղինակի խոսքով՝ ապրիլյան պատերազմի Արցախի հերոսների մասին գրելու է 11-րդ հատորում, որի աշխատանքներն արդեն սկսված են:
Նշենք, որ Գոհար Մարտիկյանը տարիներ շարունակ կյանքի է կոչում հայրենանվեր ու շնորհակալ մի գործ. մեկ առ մեկ հավաքում ու ներկայացնում է արցախյան ազատամարտում անմահացած քաջորդիների կյանքն ու նրանց սխրանքի պատմությունները` յուրաքանչյուրի հետ վերապրելով սեփական վիշտը։ Նրա որդին՝ սերժանտ Աշոտ Չախոյանը, Արցախյան պատերազմում հատուկ նշանակության գնդի առաջին զոհն էր: