Ծովանկարիչ Հովհաննես Այվազովսկու տոհմի տասը ներկայացուցիչներ առաջին անգամ տեսել են իրենց հանրահայտ բարեկամի բնօրինակ նկարները Տրետյակովյան պատկերասրահում:
Այվազովսկու ժառանգներն առաջին անգամ ծանոթացել են նկարչի բնօրինակ աշխատանքներին
ՍՏԵՓԱՆԱԿԵՐՏ, 26 հուլիսի, ԱՐՑԱԽՊՐԵՍ: Այս մասին հայտնել է Այվազովսկու թոռան՝ Ալեքսեյ Գանզենի ծոռնուհին՝ Իրինա Կասացկայան, հայտնում է Panorama.am:
«Երբ նրանք մտան Տրետյակովյան պատկերասրահի դահլիճ և առաջին անգամ տեսան իրենց նախահոր աշխատանքները, շատերը չէին կարողանում զսպել արցունքները: Նրանք բոլորը գիտակցում էին հարստության մեծությունը, որը թողել է մեծ նկարիչը, բայց առաջին անգամ կարողացան զգալ դա հենց Ռուսաստանում»,- ասել է Կուսացկայան:
Հենց նա է եղել Ավստրալիայից պատվիրակության այցի կազմակերպման նախաձեռնողը:
Այվազովսկու ժառանգները (նկարչի երրորդ դստեր որդու գծով) առաջին անգամ են այցելել Ռուսաստան: Մոսկվայում կմնան մինչև հուլիսի 28-ը, այնուհետև կգնան Թեոդոսիա՝ մասնակցելու նկարչի 200-ամյակին նվիրված տոնական միջոցառումներին:
Աշխարհում ամենահայտնի ծովանկարիչներից Հովհաննես Այվազովսկու 200-ամյակը լրանում է հուլիսի 29-ին:
Հիշեցնենք, որ 2017 թ. ՅՈՒՆԵՍԿՕ-ի կողմից հիշարժան տարեթվերի շարքում ընդգրված է Հովհաննես Այվազովսկու հոբելյանը (200-ամյակ):
Հովհաննես Այվազովսկին ծնվել է 1817 թվականին Ղրիմում՝ Թեոդոսիա քաղաքում, աղքատ հայ ընտանիքում։ Իր ընտանիքի ազգանունն Այվազյան էր։ Նկարչի նկարներից մի քանիսը կրում են այս ստորագրությունը՝ «Հովհաննես Այվազյան»: Այվազովսկու նախնիները Գալիցիայի հայերից էին, ովքեր XVII–րդ դարում Գալիցիա էին գաղթել Արևմտյան Հայաստանից։ Նրա՝ որպես նկարչի տաղանդը, իր համար ճանապարհ է բացել դեպի Սիմֆերոպոլ քաղաքի գիմնազիա, իսկ հետագայում՝ դեպի Սանկտ Պետերբուրգի գեղարվեստի ակադեմիա, որը Հովհաննես Այվազովսկին ավարտեց ոսկե մեդալով։
Ստեղծել է 6000-ից ավելի կտավ, հիմնականում ծովանկարներ: Նա չի անտեսել նաև հայրենի բնաշխարհը, հայկական թեմատիկան: Աշխատել է շատ արագ, տեսողական վիթխարի հիշողությամբ։ Իր հաջողակ ստեղծագործական գործունեության ընթացքում վաստակած զգալի գումարներով Այվազովսկին բացել է արվեստի դպրոց և պատկերասրահ իր հարազատ Թեոդոսիա քաղաքում։
Հ.Այվազովսկին վախճանվել է 1900 թվականին։ Այվազովսկին թաղված է Թեոդոսիայում՝ հայոց միջնադարյան Սուրբ Սարգիս եկեղեցու բակում։ 1903 թ.նկարչի այրին մարմարե շիրմաքար է տեղադրել, որը իտալացի քանդակագործ Լ.Բիոջոլիի աշխատանքն է։ Շիրմաքարին գրաբար փորագրված են պատմահայր Մովսես Խորենացուխոսքերը. «Մահկանացու ծնեալ անմահ զիւրն յիշատակ եթող»։
Այվազովսկու գործերը աճուրդով վաճառվել են մինչև $2 միլիոն 125 հազար ամերիկյան դոլարով։