Այսօր առավոտից ԼՂՀ առաջին ատյանի ընդհանուր իրավասության դատարանի Ստեփանակերտի նստավայրում շարունակվում է այս տարվա հուլիսին ԼՂՀ պետական սահմանը Շահումյանի շրջանում ապօրինաբար հատած ադրբեջանական դիվերսիոն-հետախուզական խմբի անդամներ, Ադրբեջանի Հանրապետության քաղաքացիներ Շահբազ Ջալալ օղլի Գուլիևի և Դիլհամ Գարդաշխան օղլի Ասկերովի դատավարությունը:
Ամբաստանյալ Շահբազ Գուլիևը չի մեղադրվում անչափահասի սպանության մեջ. դատապաշտպան
ՍՏԵՓԱՆԱԿԵՐՏ, 29 ՀՈԿՏԵՄԲԵՐԻ, ԱՐՑԱԽՊՐԵՍ:Ինչպես հայտնի է, խմբի մեկ անդամ ևս ՝ Ադրբեջանի քաղաքացի Հասան Հասանովը դիվերսանտների ձերբակալության ժամանակ զինված դիմադրություն ցույց տալու պատճառով, ոչնչացվել է:
«Արցախպրես»-ի թղթակցի հետ զրույցում, ինչպես նշել է ամբաստանյալ Շահբազ Ջալալ օղլի Գուլիևի շահերի պաշտպան Արկադի Իսրայելյանը, ի տարբերություն Դիլհամ Ասկերովի, Գուլիևը չի մեղադրվում անչափահաս Սմբատ Ցականյանի սպանության մեջ:
Ըստ Իսրայելյանի, բոլոր դատական գործողությունները կատարվում են օրենքի շրջանակներում, իհարկե, պաշտպանի ներկայությամբ։ Դատապաշտպանը տեղեկացրեց նաև, որ ամբաստանյալ Գուլիևը մեղադրվում է 6 հոդվածներով։
Նշենք, որ ամբաստանյալներ Դիլհամ Ասկերովը և Շահբազ Գուլիևն ապահովված են ռուսերենի և հայերենի մասնագետ թարգմանչով, իսկ որպես նրանց դատապաշտպաններ՝ նիստում հանդես են գալիս փաստաբաններ Էրիկ Բեգլարյանը՝ ԼՂՀ հանրային պաշտպանի գրասենյակից, և Արկադի Իսրայելյանը՝ ԼՂՀ փաստաբանների պալատից:
