Այսօր տեղի է ունեցել ԱՀ հանրային ծառայությունները և տնտեսական մրցակցությունը կարգավորող պետական հանձնաժողովի հերթական նիստը:
Հայտարարված զեղչերի անհապատասխանության համար վարչական վարույթներ են հարուցվել
ՍՏԵՓԱՆԱԿԵՐՏ, 15 օգոստոսի, ԱՐՑԱԽՊՐԵՍ: Օրակարգում ընդգրկված հարցերից առաջինն ԱՀ տարածքում ընդհանուր ուղղվածության ռադիոհաղորդումների եթերային հեռարձակման (վերահեռարձակման) լիցենզավորման մրցույթն էր:
Զեկույցով հանդես է եկել ՀԾՏՄԿՊՀ հեռուստատեսության, ռադիոյի և հեռահաղորդակցության կարգավորման բաժնի տեղակալ Անի Նիկողոսյանը, ով մասնավորապես նշել է, որ 2017 թվականի հուլիսի 12-ին «Հեռուստատեսության և ռադիոյի մասին» ԱՀ օրենքի 39-րդ հոդվածի համաձայն՝ հանձնաժողովն ըստ անհրաժեշտության, բայց առնվազն տարին մեկ անգամ, հայտարարում է ազատ, չզբաղեցրած հաճախականությունների մրցույթ: «Հայտարարվել էր մի շարք հաճախականությունների շերտերում՝ 66,0-74,0 ՄՀց, 76,0- 90,0 ՄՀց, 92,0-100,6 ՄՀց, 100,8-101,7 ՄՀց, 101,9-102,2 ՄՀց, 102,4- 102,9 ՄՀց, 103,1-103,4 ՄՀց, 103,6-104,2 ՄՀց, 104,4-104,9 ՄՀց, 105,1-105,4 ՄՀց, 105,6-105,9 ՄՀց և 107,0-108.0 ԱՀ տարածքում ընդհանուր ուղղվածության ռադիոհաղորդումների եթերային հեռարձակման (վերահեռարձակման) լիզենցավորման մրցույթ: Քանի որ սահմանված ժամկետում մրցույթին մասնակցության ոչ մի դիմում չի ներկայացվել, այն հայտարարվում է չկայացած»,- ասել է Ա. Նիկողոսյանը:
Հանձնաժողովի կողմից ընդունվել են նաև որոշումներ «Ա.Մ.Ա. Պլյուս Լ.» սահմանափակ պատասխանատվությամբ ընկերության և «Լուսինե Գալստյան» անհատ ձեռնարկատիրոջ նկատմամբ վարչական վարույթներ հարուցելու մասին:
Այս մասին տնտեսական մրցակցության բաժնի աշխատակիցները ներկայացրել են, որ հաշվի առնելով Ստեփանակերտ քաղաքում գործող հագուստի, կոշիկի և օծանելիքի խանութներում սեզոնային բնույթ կրող զեղչերը, հանձնաժողովի նախագահի հրամանների համաձայն, տնտեսական մրցակցության պաշտպանության բաժնի մասնագետների կողմից իրականացվել են դիտանցումներ՝ անբարեխիղճ մրցակցության բացահայտման նպատակով:
Դիտանցումներն իրականացվել են Ստեփանակերտ քաղաքի մի շարք խանութներում: Արդյունքում, ըստ զեկուցողների, պարզվել է, որ «Ա.Մ.Ա. Պլյուս Լ.» ՍՊԸ-ին և «Լուսինե Գալստյան» ԱՁ-ին պատկանող խանութների դիմային մասում արտապատկերված 50 տոկոս զեղչը չի գործում խանութներում առկա բոլոր ապրանքների վրա: Տնտեսվարող սուբյեկտների կողմից խանութի դիմային մասում արտապատկերելով զեղչեր, առանց զեղչերը կոնկրետացնող կամ հստակեցնող որևէ բառերի ուղեկցմամբ, հասարակության մեջ ստեղծվում է, կամ կարող է ստեղծվել տպավորություն, որ զեղչը գործում է խանութում առկա բոլոր ապրանքների վրա:
