Այսօր Մարտունի քաղաքի օրն է: Թեև քաղաքը տասնամյակների պատմություն ունի, սակայն մարտունեցիները քաղաքի օրն են համարում օգոստոսի 17-ը, քանի որ 1992թ-ի այդ օրը կանխվել է Մարտունու ուղղությամբ հակառակորդի մի քանի ուղղություններով հարձակումը:
Այսօր Մարտունի քաղաքի օրն է. սպասվող տոնական միջոցառումների մասին պատմել է քաղաքապետը
ՍՏԵՓԱՆԱԿԵՐՏ, 17 օգոստոսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Մարտունու քաղաքապետ Մհեր Խաչատրյանը նշել է, որ այս տարվա տոնական միջոցառումները տեղի են ունենալու հոկտեմբեր ամսին: «Արդեն մի քանի տարի է օգոստոսի 17-ին քաղաքում կազմակերպվում են տոնական միջոցառումներ, սակայն այս տարվա միջոցառումների ծրագիրը մի փոքր փոխել է օրվա խորհուրդը: Առանձին շուք հաղորդելու համար նախատեսում ենք կազմակերպել համաքաղաքային միջոցառում՝ կամ նռան փառատոնի, կամ էլ ավանդական դարձած «Ոսկե աշուն» ծրագրի ձևով»,- ասել է քաղաքապետը:
Անդրադառնալով քաղաքում իրականացվող ծրագրերին՝ քաղաքապետը նշել է, որ ապրիլ ամսին շահագործման է հանձնվել նոր բազմաբնակարան թաղամաս: Նույն թաղամասի հարակից տարածքում սկսվել է նաև երկրորդ բազմաբնակարան թաղամասի կառուցումը:
Խոսելով շինարարական այլ ծրագրերի մասին՝ Մարտունու քաղաքապետը նշել է, որ «Մոնթե Մելքոնյանի անվան պետական մանկապարտեզ» ՊՈԱԿ-ի վերանորոգումը ևս սկսվել է: Իսկ նախորդ տարի տեղի էր ունեցել «Թիվ մեկ պետական մանկապարտեզ» ՊՈԱԿ-ի վերանորոգված շենքի բացման հանդիսավոր արարողությունը: Կապիտալ վերանորոգման փուլում է գտնվում ֆուտբոլի դաշտը: Բացի դրանից քաղաքում իրականացվել է փողոցների սալահատակում: Կատարվել է նաև կանաչապատում՝ շուրջ 300 միավոր թուփ և ծառ է տնկվել:
Քաղաքապետը հավաստիացրեց, որ Մարտունու զարգացման ծրագիրը գտնվում է պետական հոգածության ներքո և բարեգործական ծրագրերի հետ միասին տարեցտարի այն ավելի գրավիչ տեսք է ստանում:
