Այսօր Ստեփանակերտի մշակույթի և երիտասարդության պալատում Կարմիր խաչի միջազգային կոմիտեի Արցախի գրասենյակը կազմակերպել է անհայտ կորածների միջազգային օրվան նվիրված ցուցահանդես:
Ստեփանակերտում բացվել է անհայտ կորածների օրվան նվիրված ցուցահանդես
ՍՏԵՓԱՆԱԿԵՐՏ, 30 օգոստոսի, ԱՐՑԱԽՊՐԵՍ: «Արցախպրես»-ի հաղորդմամբ` ցուցահանդեսին բացման խոսքով հանդես է եկել Լեռնային Ղարաբաղում Կարմիր խաչի միջազգային կոմիտեի առաքելության «Սատարում անհայտ կորածների ընտանիքներին» ծրագրի պատվիրակ Շառլոտ Յանսը, ով շնորհակալություն է հայտնել հյուրերին՝ ներկա գտնվելու և անհայտ կորածների միջազգային օրը հիշատակելու համար:
Նա նշել է, որ ցուցահանդեսը կազմակերպվել է ԿԽՄԿ-ի և անհայտ կորածների ընտանիքների համատեղ ուժերով, և այն համարվում է սատարման ծրագրի մի մասը, որը Կարմիր խաչի միջազգային կոմիտեն իրականացնում է՝ սկսած 2011 թվականից:
«Լուսանկարներից շատերը խոսում են ընտանիքների փոխարեն, սակայն այս ընտանիքների հույսերն ու տառապանքներն անհայտ են մնում հասարակությանը: Այսօր մենք, օգտվելով հնարավորությունից, Ձեզ հետ ենք կիսվում բանաստեղծություններով և մեջբերումներով, որոնք պատկանում են անհայտ կորածների ընտանիքներին, և որոնք ավելի լավ են նկարագրում նրանց իրական հոգեվիճակը»,- ավելացրել է Շ. Յանսը:
Իսկ Արցախում ԿԽՄԿ-ի առաքելության ղեկավար Դրագոսլավ Բլաժևիչը նշել է, որ այս նախագծով ԿԽՄԿ-ն ցանկանում է իր հարգանքը ցուցաբերել անհայտ կորած անձանց ընտանիքներին և բոլոր նրանց, ովքեր ջանքեր են գործադրում օգնել այս ընտանիքներին:
«Ցուցադրված լուսանկարներն արտացոլում են անհայտ կորած անձանց հարազատների ծանր ապրումները, որոնցով նրանք անցնում են իրենց ամենօրյա կյանքում և այս լուսանկարները բարձրաձայնում են ընտանիքների անվերջ տառապանքները: Նրանք հիշեցնում են մեզ, որ զինված հակամարտության պայմաններում մեր սիրելիների անհետացումը ոչ միայն ցավալի հետևանք էր, այլև՝ մարդկային ողբերգություն»,- ասել է Դ. Բլաժևիչը և հավելել, որ անհայտ կորած անձանց ճակատագրի պարզաբանումը մնում է տարածաշրջանում ԿԽՄԿ-ի հիմնական խնդիրներից մեկը:
Սկսած 1992 թվականից ղարաբաղյան հակամարտության հետևանքով ԿԽՄԿ-ն տարածաշրջանում գրանցել է անհայտ կորած համարվող ավելի քան 4500 անձանց, որոնց մեծ մասի ճակատագիրն առայսօր անհայտ է մնում:
Միջոցառմանը ներկա էին ԱՀ մշակույթի և երիտասարդության նախարար Նարինե Աղաբալյանը, ԱՀ առողջապահության նախարար Կարինե Աթայանը, արդարադատության նախարար Արարատ Դանիելյանը, ԼՂՀ «Անհայտ կորած ազատամարտիկների հարազատների միություն» ՀԿ նախագահ Վերա Գրիգորյանը, անհայտ կորած ազատամարտիկների հարազատներ, հյուրեր:
