ԱՄՆ-ում գործող «Artsakh Arts and Cultural Foundation»-ը շարունակելու է իր նպաստը բերել Արցախին:
«Artsakh Arts and Cultural Foundation»-ի համագործակցությունը շարունակվելու է ի նպաստ Արցախի
ՍՏԵՓԱՆԱԿԵՐՏ, 31 օգոստոսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է «Artsakh Arts and Cultural Foundation»-ի հիմնադիր Գարո Մադենլիանը:
Մեր զրուցակցի խոսքով՝ հիմնադրամն առաջիկայում նախատեսում է Արցախի մասին կարճամետրաժ տեսանյութեր պատրաստել, որոնք այցեքարտ կլինեն զբոսաշրջիկների համար: Իսկ սեպտեմբերի վերջին հիմնադրամը կմեկնարկի նոր ծրագիր, որի միջոցով նախատեսվում է քնապարկեր ուղարկել պաշտպանության բանակի համար:
«Բացի այսօրինակ բարեգործական ծրագրերից մենք լավ համագործակցություն ունենք նաև արցախցի կինոռեժիսոր Ջիվան Ավետիսյանի հետ: Նրա հետ ծանոթացել ենք Երևանում՝ «Թևանիկ» ֆիլմի պրեմիերայի ժամանակ: Հետո որոշեցինք օգտակար լինել «Վերջին բնակիչը» ֆիլմին: Մեր համագործակցությունը շարունակվելու է նաև նրա նոր ֆիլմի՝ «Դրախտի դարպասը» նկարահանելու համար»,- նշել է Գարո Մադենլիանը և ավելացրել, որ Ջիվանը մեծ գործ է անում Արցախը կինոյի միջոցով ներկայացնելով աշխարհին: Խոսելով Հիմնադրամի հետ համագործակցության մասին՝ Ջիվան Ավետիսյանը նշել է, որ բարձր է գնահատում ձևավորված հարաբերությունները:
«Անցած տարվա ապրիլին ԱՄՆ-ում՝ «Ալեքս» կինոթատրոնում, «Artsakh Arts and Cultural Foundation»-ի շնորհիվ կազմակերպվել էր «Վերջին բնակիչը» ֆիլմի ցուցադրությունը, որին անդրադարձել էին «Ոսկե Գլոբուս»-ի պաշտոնական կայքը և ամերիկյան հայտնի «Los Angeles Times» օրաթերթը»,- ասել է Ջ. Ավետիսյանը և հավելել սեպտեմբերի 15-ից «Վերջին բնակիչը» կցուցադրվի ԱՄՆ մի շարք քաղաքներում:
Ջ. Ավետիսյանը նշել է նաև, որ է «Վերջին բնակիչը»-ը ցուցադրվելու է նաև սեպտեմբերի 4-ին Վենետիկի կինոփառատոնի Venice production Bridge-ում շրջանակներում: Նշենք, որ Ջիվան Ավետիսյանի «Վերջին բնակիչը» ֆիլմը ցուցադրվել է Շանհայի 20-րդ միջազգային կինոփառատոնում, «Ոսկե գլոբուս» ամենամյա մրցանակաբաշխությանը, Լիբանանում, ԱՄՆ-ում, Ռուսաստանում, Իրանում և այլ երկրներում:
