Ադրբեջանից Եվրոպայի խորհրդի Խորհրդարանական վեհաժողովի որոշ անդամներին կատարած վճարումների վերաբերյալ գաղտնազերծված տեղեկությունները խոստանում են ցնցել ԵԽԽՎ-ն:
Ադրբեջանի ստվերային դրամարկղի մասին տեղեկությունները կցնցեն ԵԽԽՎ-ն. The Guardian
ՍՏԵՓԱՆԱԿԵՐՏ, 5 սեպտեմբերի, ԱՐՑԱԽՊՐԵՍ: Վճարումների մանրամասները համընկել են ԵԽԽՎ-ում կոռուպցիային վերաբերող գաղտնի լսումներին, հայտնում է The Guardian-ը: Երեք անկախ փորձագետներից կազմված խումբը, որը հետաքննությամբ կզբաղվի, ստեղծվել է հուլիսին, երբ նախկին իտալացի պատգամավոր Լուկա Վոլոնտեին մեղադրել են Ադրբեջանի կառավարությանն աջակցելու դիմաց Բաքվից միլիոնավոր եվրոներ ստանալու մեջ, հայտնում է news.am-ը։
Դանիացի պատգամավոր Պիտեր Օմտզիգտի խոսքով՝ հետաքննություն սկսելու որոշումը վկայում է ամբողջ Վեհաժողովում առկա պարբերական խնդիրների մասին։
Էստոնիայից Վեհաժողովի մեկ այլ պատվիրակ՝ Անդերս Հերկելը նշում է, որ նման չարաշահումները վնաս են հասցրել են ԵԽԽՎ հեղինակությանը։ Նա ասել է, որ ինքն անձամբ երբեք կաշառքի դեպքի վկա չի եղել, սակայն տարօրինակ քվեարկության եւ տարօրինակ կարծիքների ականատես եղել է։ «Շատերին մանիպուլյացիայի են ենթարկել, եւ նրանք հիմա են սկսում հասկանալ, թե ինչ է տեղի ունեցել իրենց մասնակցությամբ»,-նշում է Հերկելը։
Պարբերականի համաձայն՝ հետաքննությունը համընկել է նաեւ ԵԽԽՎ-ի համար դժվարին ժամանակաշրջանին։ Սպասվում է, որ հոկտեմբերին՝ աշնանային նստաշրջանի ժամանակ, պատգամավորները կքվեարկեն Վեհաժողովի նախագահի պաշտոնից Պեդրո Ագրամունտի պաշտոնանկության օգտին, որը դեռ շարունակում է պայքարել պաշտոնի համար։
Հիշեցնենք. սեպտեմբերի 4-ին The Guardian պարբերականը հետաքննություն էր հրապարակել, որի համաձայն՝ Ադրբեջանի իշխող վերնախավն օգտագործել է գաղտնի «սեւ դրամարկղը» (2.9 մլրդ դոլար)՝ եվրոպացի քաղաքական գործիչներին կաշառելու, շքեղ իրեր ձեռք բերելու, Մեծ Բրիտանիայում կեղծ ընկերությունների միջոցով փողեր լվանալու համար։