Սեպտեմբերի 11-ից Հադրութ քաղաքում մեկնարկել է «Դիզակի գույները» խորագրով առաջին նկարչական սիմպոզիումը:
Հադրութում մեկնարկել է առաջին նկարչական սիմպոզիումը (լուսանկարներ)
ՍՏԵՓԱՆԱԿԵՐՏ, 12 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ սիմպոզիումին Արցախից և Հայաստանից մասնակցում են 10 նկարիչ:
Սիմպոզիումի բացմանը Հադրութի շրջվարչակազմի աշխատակազմի մշակույթի և երիտասարդության հարցերի բաժնի վարիչ Երազիկ Հայրիյանը համառոտ անդրադարձ է կատարել «Դիզակի գույները» նկարչական սիմպոզիումի առաջնահերթություններին՝ կարևորելով նաև մշակութային միջոցառումների անցկացումը, ինչը հնարավորություն է տալիս անմիջական շփումների միջոցով փոխադարձ ճանաչելի դարձնել Արցախի հարուստ և բազմազան մշակութային ժառանգությունը։
«Սիմպոզիումը նպատակ ունի նաև Հադրութ քաղաքը հարստացնել մշակութային նոր արժեքներով»,- նշել է Ե. Հայրիյանը:
Միջոցառմանը ելույթներով հանդես են եկել Շուշիի կերպարվեստի պետական թանգարանի տնօրեն Լուսինե Գասպարյանը, Մոսկվայի «Ժամ» ամասագրի խմբագրի տեղակալ Վլադիմեր Պետունցը, ովքեր ողջունել են նման միջացառումների կազմակերպումը և հույս հայտնել, որ այն շարունակական բնույթ է կրելու և այսպիսի միջոցառումներով ավելի է ակտիվանալու Հադրութի մշակութային կյանքը:
Սիմպոզիումի բացմանը ներկա են եղել նաև Հադրութի շրջվարչակազմի ղեկավարի պաշտոնակատար Վալերի Գևորգյանը, հյուրեր արտերկրից, համաքաղաքացիներ և այլք:
Միջոցառման փակման արարողությունը տեղի է ունենալու սեպտեմբերի 16-ին Տողի մելիքական ապարանքում անցկացվելիք արցախյան գինու չորրորդ փառատոնին:
Նշենք, որ «Դիզակի գույները» նկարչական առաջին սիմպոզիումի կազմակերպմանն աջակցել են ԱՀ մշակույթի և երիտասարդության հարցերի նախարարությանը, Հադրութի շրջվարչակազմը, «Արարատ» հիմնադրամը,«Կատարո» գինու գործարանի տնօրինությունը, և մոսկովյան «ժամ» ամսագիրը: