Պատմական ճշմարտությունը չպետք է կախված լինի պետության շահերից։
Ցինկեր. Հարցումները ցույց են տալիս, որ Իսրայելի բնակչության մեծ մասը կողմ է ցեղասպանության ճանաչմանը
ՍՏԵՓԱՆԱԿԵՐՏ, 15 սեպտեմբերի, ԱՐՑԱԽՊՐԵՍ: Երեւանում լրագրողների հետ հանդիպման ժամանակ նման կարծիք է հայտնել քաղաքագետ, Հայաստան–Իսրայել հասարակական ֆորումի համանախագահ Ալեքսանդր Ցինկերը՝ պատասխանելով Իսրայելի կողմից Հայոց ցեղասպանության ճանաչման հնարավորության մասին հարցին։
Նշենք, որ օրերս Կնեսետի պատգամավորների մի խումբ Երեւանում այցելել էր Ծիծեռնակաբերդի հուշահամալիր։
«Ես տեսա Ծիծեռնակաբերդում պատգամավորների արձագանքը։ Ճիշտ են ասում՝ մի բանի մասին հազար անգամ լսելը նույնը չէ, ինչ տեսնելը։ Ցեղասպանության ողբերգությունը գիտակցող պատգամավորների եւ մարդկանց թիվն աճում է»,– News.am-ի փոխանցմամբ՝ նշեց Ցինկերը։
Նախկին պատգամավորը միաժամանակ նշեց, որ կա քաղաքական խնդիր։ «Երբ Թուրքիայի հետ հարաբերությունները լավ էին, կարծում էին, թե պետք չի ճանաչել Ցեղասպանությունը, որպեսզի չփչացնեն հարաբերությունները։ Երբ այդ հարաբերությունը փչացան, մեզ ասում էին, թե Թուրքիայի հետ հարաբերությունները պետք է լավացնել։ Պետք է բաժանել պատմությունը քաղաքականությունից։ Ցեղասպանության ճանաչման գործընթացն ընթանում է, թեկուզ եւ դանդաղ»,– ասաց Ցինկերը։
Նրա խոսքով՝ հարցումները ցույց են տալիս, որ Իսրայելի բնակչության մեծ մասը կողմ է ճանաչմանը։ «Ուզում ենք հուսալ, որ հարցը կլուծվի։ Դեռեւս հասել ենք նրան, որ Կնեսետի մշակութային հարցերի հանձնաժողովը քննարկի հարցը եւ համաձայնության գա։ Հաջորդ փուլը հարցը լիագումար նիստի քննարկմանը դնելն է։ Որքան հաճախ այստեղ քաղաքական գործիչներ գան, այնքան լավ»,– եզրափակեց Ալեքսանդր Ցինկերը։
