Ադրբեջանա-ղարաբաղյան հակամարտությունը ոչ կրոնական է, ոչ էլ տարածքային, այն նախեւառաջ երկու տարբեր քաղաքակրթական մոտեցումների, վարքագծերի բախում է:
Ադրբեջանի սպառազինությունների մրցավազքը մտահոգիչ է ողջ տարածաշրջանի անվտանգության համար. Կարեն Միրզոյան
ՍՏԵՓԱՆԱԿԵՐՏ, 18 սեպտեմբերի, ԱՐՑԱԽՊՐԵՍ-ԱՐՄԵՆՊՐԵՍ: «Հայաստան-Սփյուռք» 6-րդ համաժողովի շրջանակում արտաքին քաղաքական օրակարգին նվիրված նիստում նման համոզմունք հայտնեց Արցախի Հանրապետության արտգործնախարար Կարեն Միրզոյանը: «Պաշտոնական Բաքուն շարունակաբար փորձում է կրոնական երանգ հաղորդել հակամարտությանը: Մահմեդական երկրների աջակցությունը ապահովելու նպատակով իսլամական գործոնի չարաշահումը հատկապես մտահոգիչ է հարեւան միջերկրական եւ մերձավորարեւելյան տարածաշրջանում տեղի ունեցող աշխարհաքաղաքական իրադարձությունների համատեքստում, որոնք արձագանք են ունենում մեր տարածաշրջանում եւս: Բաքվի՝ իսլամական ահաբեկիչների հետ համագործակցության արմատները գնում են 90-ականների սկիզբ, երբ ադրբեջանական զորքերի շարքերում ահաբեկչական խմբավորումների վարձկաններն էին: Նույնիսկ զինադադարից հետո սա ոչ միայն չդադարեց, այլեւ մտավ նոր փուլ, երբ Ադրբեջանը դարձավ տարանցիկ գոտի զենքի ապօրինի մատակարարումների եւ ահաբեկիչների աջակցության համար: Ադրբեջանն այսօր փորձում է իր բարքերը պարտադրել այլ երկրներին՝ նրանց թելադրելով իր սեփական կանոնները, դրա համար օգտագործելով բոլոր հնարավոր միջոցները՝ ընդհուպ քաղաքական գործիչներին եւ պաշտոնյաներին կաշառելը»,-ասաց նա: Կարեն Միրզոյանի խոսքով՝ Ադրբեջանի սպառազինությունների մրցավազքը մտահոգիչ է ոչ միայն հայկական երկու պետությունների, այլեւ հենց տարածաշրջանի անվտանգության տեսանկյունից: «Որպես մեր առջեւ ծառացած հիմնական մարտահրավեր՝ մենք դիտարկում ենք ադրբեջանա-ղարաբաղյան հակամարտությունը եւ բազմիցս վերահաստատել ենք մեր անկոտրում համոզմունքը, որ այն հնարավոր է կարգավորել բացառապես խաղաղ բանակցությունների միջոցով, միջազգային իրավունքի հիմնարար սկզբունքների, նախեւառաջ ժողովուրդների ինքնորոշման իրավունքի հենքի վրա, հակամարտության կարգավորումը թույլ կտա ապահովել ոչ միայն երկու հայկական պետությունների խաղաղ եւ անվտանգ զարգացումը, այլեւ զգալիորեն կբարելավի անվտանգության մթնոլորտը ողջ տարածաշրջանում: Ցավոք, չնայած երկու հայկական պետությունների ջանքերին, որոնք իրենց աջակցությունն են ստանում միջազգային հանրության, մասնավորապես հակամարտության կարգավորմամբ զբաղվող միջնորդների կողմից, Ադրբեջանը շարունակ փորձում է հիմնահարցը լուծել հօգուտ իրեն՝ չխորշելով ռազմական ճանապարհից, պարբերաբար մեծացնելով լարվածությունը, ձեռնարկելով քայլեր՝ ուղղված Արցախի մեկուսացմանը»,-ընդգծեց Կարեն Միրզոյանը՝ հավելելով, որ ստեղծված պայմաններում պետք է ուշադրություն դարձնել պաշտպանական համակարգի եւ բանակի կատարելագործմանն ու արդիականացմանը՝ որպես տարածաշրջանում Ադրբեջանի ռազմատենչ նկրտումների զսպման եւ կայունության ապահովման հիմնական գործոն: