Սեպտեմբերի 22-ին Ստեփանակերտի «Վալլեքս Գարդեն Սինեմա» կինոդահլիճում տեղի է ունեցել գերմանացի ռեժիսոր Յանա Ռիխտերի «Պատերազմի հետքերը» վավերագրական ֆիլմի առաջնախաղը։
Ստեփանակերտում կայացել է գերմանացի ռեժիսորի Արցախի մասին նկարահանված ֆիլմի առաջնախաղը
ՍՏԵՓԱՆԱԿԵՐՏ, 23 սեպտեմբերի, ԱՐՑԱԽՊՐԵՍ: Ֆիլմը պատմում է Զուար և Հավսաթաղ գյուղերում ապրող մարդկանց առօրյա կյանքի և կենցաղի պատմությունը: Ծովակը գյուղի դպրոցի տնօրենն է, միաժամանակ դասավանդում է մաթեմատիկա և ֆիզիկա: Նա իր ընտանիքի հետ ապրում է Զուար գյուղում:
Սայաթը պրոֆեսիոնալ պարող է, սակայն ներկա պահին նա Հավսաթաղի գյուղապետն է, որտեղ և ապրում է իր ընտանիքի հետ միասին: Նկարահանմանը մասնակցել են արցախցիներ, ովքեր ծնվել ու մեծացել են Արցախում, ովքեր կապել են իրենց ճակատագիրը այս հողի հետ: Գյուղերը գտնվում են մի երկրում, որը «գոյություն չունի»:
«Արցախպրես»-ի թղթակցի հետ զրույցում ֆիլմի սցենարի հեղինակ և ռեժիսոր Յանա Ռիխտերն ասել է, որ Արցախի և Հայաստանի մասին Գերմանիայում ինքն իր հայ դասախոսից է լսել։ «Տարիներ անց ես եկել և իմ աչքերով տեսել ու վավերագրել եմ Արցախյան պատերազմի հետքերը: Ու 10 տարի անց նորից Արցախում եմ ու այստեղ նկատելի մեծ փոփոխություններ եմ տեսել։»,- ասել է Յ․ Ռիխտերը և ավելացրել, որ 10 տարի անց նորից ֆիլմ նկարահանելու ցանկություն ունի, որը կլինի այդ ֆիլմի շարունակությունը, և միջազգային հանրության դատին կներկայացնի ոչ թե գոյություն չունեցող երկրի մասին, այլ հենց Արցախի՝ զարգացող ու բարգավաճող երկրի մասին։ 
Ֆիլմի պրոդյուսեր Դավիթ Սաֆարյանն էլ ասել է, որ Յանայի դասախոսը հենց ինքն է, ով Արցախի և Հայաստանի մասին տեղեկացրել է իր տաղանդաշատ ուսանողուհուն։
«Երբ Յանան ցանկություն հայտնեց Արցախի մասին ֆիլմ նկարահանել, ես զարմացա՝ մտածելով, որ գերմանուհին ինչպես կարող է առանց հայի ցավն ու դարդն իմանալու ֆիլմ ստեղծել։ Համաձայնվեցինք, Յանան ժամանակ առ ժամանակ եկավ Արցախ․ ամիսներով ապրեց, զրուցեց մարդկանց հետ՝ ծանոթացավ նրանց խնդիրներին, որից հետո սկսեցինք ֆիլմի նկարահանումները։
Ասեմ, որ Յանային հաջողվել է նկարահանել արցախյան իրական մթնոլորտ, ճշգրիտ իրողություններ, հետաքրքիր դրվագներ»,- ասել է Դ․ Սաֆարյանը և հավելել, որ «Պատերազմի հետքերը» ֆիլմը Studio DS, Richter Production, Nur Film Group ընկերությունների համատեղ արտադրանքն է:
Այն ճանաչվել է Լավագույն ֆիլմ ոչ ազգագրագետ-մարդաբան հեղինակի կողմից` Etnofilm 8th Ethnographic Film Festival–ի և Լավագույն միջին տևողության ֆիլմ` Atlantidoc 9th Festival Internacional de Cine Documental–ի ժամանակ։ Մասնակցել է նաև այլ փառատոնների։ Մի շարք միջազգային փառատոներին մասնակցելուց և մրցանակներ շահելուց հետո հեղինակները որոշեցին ցուցադրություն կազմակերպել Հայաստանում և Արցախում:
