Հոկտեմբերի 12-ից 14-ը Արցախի Հնրապտետությունը ներկայացված էր ՌԴ Սանկտ-Պետերբուրգ քաղաքում ընթացող «Ինվետեքս 2017» միջազգային զբոսաշրջային ցուցահանդեսում։
Արցախի տաղավարի մոտ ադրբեջանցիները սադրանքի են դիմել «Ինվետեքս 2017» միջազգային զբոսաշրջային ցուցահանդեսում
ՍՏԵՓԱՆԱԿԵՐՏ, 14 հոկտեմբերի, ԱՐՑԱԽՊՐԵՍ: ԱՀ մշակույթի, երիտասարդության հարցերի և զբոսաշրջության նախարարության տեղեկացմամբ՝ Արցախը՝ որպես զբոսաշրջային ուղղություն հետաքրքրություն է առաջացրել տուրիզմի ոլորտի մասնագետների և ցուցահանդեսի այցելուների մոտ։
Գերատեսչության աշխատակիցների կողմից տարվել են արդյունավետ աշխատանքներ՝ ուղղված տեղում Արցախի զբոսաշրջային ներուժի մասին տեղեկացվածության բարձրացմանը։ Մասնավորապես՝ բաժանվել է մեծ քանակությամբ զբոսաշրջային գրականություն, տեսահոլովակներով սկավառկներ, քարտեզներ, բացի այդ՝ ցուցահանդեսի մասնակիցներին ներկայացվում էին Արցախ այցելելու և շրջագայություններ կազմակերպելու հնարավորությունները։
Ցուցահանդեսի ընթացքում տեղ են գտել նաև ադրբեջանցիների սադրանքները։ Այսպես, ցուցահանդեսի ողջ ընթացքում տարբեր խողովակներով Ադրբեջանի Հանրապետության մի շարք պաշտոնական անձինք, համայնքի ներկայացուցիչներ փորձում էին ճնշում գործադրել ցուցահանդեսի կազմակերպիչների վրա՝ ԱՀ պատվիրակության աշխատանքները դադարեցնելու պահանջով։ Հասկանալով, որ իրենց ջանքերը ապարդյուն են՝ ցուցահանդեսի վերջին օրը մի խումբ ադրբեջանցիներ փորձել են տեղում խոչընդոտել Արցախի տաղավարի աշխատանքները՝ լարվածություն ստեղծելով տաղավարի շուրջ։ Սակայն ձեռնարկված միջոցառումների շնորհիվ հաջողվեց կասեցնել նաև այդ սադրանքը և ցուցահանդեսի անվտանգության աշխատակիցների ուղեկցությամբ ադրբեջանցիները դուրս են հանվել ցուցահանդեսի տարածքից։
Ինչպես հայտնում է ԱՀ տաղավարի պատասխանատուներից Արտակ Գրիգորյանը, պատվիրակութունը մինչև վերջին րոպեն առանց որևէ խափանումների կամ խոչընդոտների մասնակցել է ցուցահանդեսին:
Ցուցահանդեսում Արցախի տաղավարի աշխատանքները կազմակերպվել էին ԱՀ մշակույթի, երիտասարդության հարցերի և զբոսաշրջության նախարարության կողմից։