ԱՀ գյուղատնտեսության նախարարությունում այսօր կազմակերպվել է «Նռան այգիների մշակություն» թեմայով դասախոսություն՝ մասնակցությամբ արտերկրից ժամանած գիտակ մասնագետի:
Ստեփանակերտում կազմակերպվել է «Նռան այգիների մշակություն» թեմայով դասախոսություն
ՍՏԵՓԱՆԱԿԵՐՏ, 14 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱՀ գյուղատնտեսության նախարար Ժիրայր Միրզոյանը:
Նա ասել է, որ գործին քաջատեղայակ արտերկրից ժամանած մասնագետը եղել է Արցախի տարբեր շրջաններում՝ ծանոթացել նռան այգիների մշակության գործընթացին և տվել համապատասխան ցուցումներ:
«Առանձնակի ուշադրություն ենք դարձնելու Արցախում նռան այգիների մշակությանը: Հաշվի առնելով մեր ունեցած ներուժը՝ նպատակ ունենք մի քանի անգամ ավելացնել նռան այգիների քանակը: Շատ կարևոր է այն հանգամանքը, որ մենք, քառապատկելով նռան այգիները, հաշվի առնենք միջազգային փորձը, ժամանակակից մեթոդները, ինչպես նաև այգիների տնկման, խնամքի գրագետ ձևերը,-ասել է Ժ. Միրզոյանը և ավելացրել,-նման դասախոսություններով, մենք հիմք ենք դնում նոր մշակույթի»:
Ժ. Միրզոյանի խոսքով՝ իրենք հողօգտագործողներից ակնկալում են առաջարկներ, որպեսզի ԱՀ գյուղատնտեսության նախարարությունը դարձնեն մի յուրօրինակ հարթակ՝ խնդիրներ վեր հանելու, մասնագիտական ուսուցման, վերապատրաստման, խորհրդատվության և այլ նպատակներով:
Մեզ հետ զրույցում ԱՀ գյուղատնտեսության փոխնախարար Վիլեն Ավետիսյանն էլ ասել է, որ այգեգործության զարգացման ծրագրի շրջանակներում արտերկրից պարբերաբար հրավիրվում են մասնագետներ, ովքեր իրենց խորհուրդներով և փորձով օգնում են Արցախի հողօգտագործողներին:
«Նռան այգիների մշակության շատ ձևեր կան, և մենք պետք է ուսումնասիրենք տարբեր երկրների փորձը, որ կարողանանք գործին ճիշտ մոտեցում ցուցաբերել: Նուռն մեծ պահանջարկ ունի ոչ միայն Արցախում, այլև Հայաստանում և արտերկրում: Նռան մշակության համար Արցախում կան բարենպաստ բոլոր պայմանները:Նախատեսում ենք Արցախում ներկայիս 1000 հա նռան այգիները հետագայում հասցնել մինչև 5000 հա-ի»,-ասել է Վ. Ավետիսյանը:
Փոխնախարարը նշել է նաև, որ դասախոսությանը մասնակցում է ավելի քան 70 հողօգտագործող:
Արտերկրից ժամանած մասնագետը դասախոսության ընթացքում ներկայացրել է նռան մշակության ուղղությամբ իր դիտարկումները, պատասխանել հողօգտագործողներին հետաքրքրող հարցերին: