Արցախի պետական համալսարանում կայացած «ԱրՊՀ ռեկտորի գավաթ» ինտելեկտուալ խաղով այսօր ավարտվել է «Ուսանող-աշակերտ-զինվոր. միասնության ուժը» ծրագիրը՝ նվիրված Արցախյան շարժման 30-ամյակին:
ԱրՊՀ-ում ավարտվել է «Ուսանող-աշակերտ-զինվոր. միասնության ուժը» ծրագիրը (լուսանկարներ)
ՍՏԵՓԱՆԱԿԵՐՏ, 15 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ մինչ միջոցառումը՝ ԱՀ Ազգային ժողովի նախագահ Աշոտ Ղուլյանը, ԱՀ ԿԳՍ նախարար Նարինե Աղաբալյանը, ԱրՊՀ ռեկտոր Մանուշ Մինասյանը և ծրագրի մասնակիցները ծաղիկներ են խոնարհել արցախյան ազատամարտում ԱրՊՀ զոհված ուսանողների հիշատակը հավերժացնող հուշաքարին:
Միջոցառման բացմանն Աշոտ Ղուլյանն իր խոսքում կարևորել է նման ծրագրերը՝ մասնավորապես ասելով.
«Կարծում եմ՝ պատահական չէ, որ Արցախյան շարժման 30-ամյակին նվիրված առաջին միջոցառումը տեղի է ունենում ԱրՊՀ-ում, չէ որ 30 տարի առաջ փետրվարին հենց այս համալսարանի ուսանողներն ու դասախոսներն են համախմբվել և կազմակերպել առաջին ցույցը, որն էլ հետագայում վեր է ածվել համաժողովրդական ընդվզման»:
ԱրՊՀ ուսանողների, շրջանավարտների և հասարակայնության հետ տարվող աշխատանքների գծով պրոռեկտոր Վիտյա Յարամիշյանն էլ իր ելույթում նշել է, որ «Ուսանող-աշակերտ-զինվոր. միասնության ուժը» ծրագիրը մշակվել և իրագործվել է ԱրՊՀ ուսանողների կողմից, և այն կարելի է համարել համնալսարանի ամենահաջողված ծրագրերից մեկը:
«Ծրագրին, որը տևել է շուրջ 3 ամիս, մասնակցել են 250 ուսանող և ԱՀ բոլոր շրջանների դպրոցների շուրջ 400 աշակերտ: Ծրագրի շրջանակներում մասնակիցները եղել են տարբեր զորամասերում, որտեղ մշակութային զանազան միջոցառումներ են կազմակերպել: Արցախի դրոշը (25 մետր երկարությամբ) ծածանելով՝ աշակերտները և ուսանողներն իրականացրել են 7 երթ դեպի շրջկենտրոններում կառուցված արցախյան ազատամարտում նահատակված հայորդիների հուշակոթողներին և ծաղիկներ խոնարհել նրանց հիշատակին: Ծրագրի մասնակիցները սանմաքրման և բարեկարգման աշխատանքներ են իրականացրել Դադիվանքի վանական համալիրում, Շուշիի Ս. Ղազանչեցոց եկեղեցում և Տանկ-հուշարձանի տարածքում: Հադրութի, Մարտունու և Շուշիի դպրոցներում համալսարանի դասախոսները հանդես են եկել դասախոսություններով: Ծրագրի ընթացքում կազմակերպվել են նաև հանդիպումներ կրթության շրջանային բաժինների ղեկավարների, ավագ և միջնակարգ դպրոցների տնօրենների, ուսուցչական և աշակերտական կոլեկտիվների հետ: Իրականացվել է նաև բարեգործական ակցիա Բերձորի գիշերօթիկ դպրոցի երեխաների համար՝ նրանց ներկայացնելով զվարճալի համերգային ծրագիր»,-մանրամասնել է Վ. Յարամիշյանը:
ԱՀ շրջանների դպրոցներում անցկացված ինտելեկտուալ խաղերի մրցույթի լավագույնը ճանաչված 8 թիմերը մասնակցել են «ԱրՊՀ ռեկտորի գավաթ» եզրափակիչ խաղին և արժանացել շնորհակալագրերի և նվերների:
Ինտելեկտուալ մրցույթին «ԱրՊՀ ռեկտորի գավաթ»-ին է արժանացել Ասկերանի Էդմոն Բարսեղյանի անվան միջնակարգ դպրոցի թիմը:
Պարգևատրումից հետո ծրագրի մասնակիցները երթով և 25մ երկարությամբ դրոշով շարժվել են դեպի Ստեփանակերտի Վերածննդի հրապարակ և երկինք բաց թողել ճերմակ աղավնիներ:
