Այսօր՝ դեկտեմբերի 15-ին, տեղի է ունեցել ԱՀ մշակույթի, երիտասարդության հարցերի և զբոսաշրջության նախարար Սերգեյ Շահվերդյանի տարեվերջյան մամուլի ասուլիսը, որի ընթացքում նա պատասխանել է լրագրողների կողմից հնչեցված հարցերին:
Ստեփանակերտի դրամատիկականի վերակառուցումը շարունակում է օրախնդիր մնալ. նախարար
ՍՏԵՓԱՆԱԿԵՐՏ, 15 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ տարվող մշակութային քաղաքականության մասին հարցին ի պատասխան՝ նախարարը նշել է, որ մշակույթը պետք է հասանելի լինի բոլոր խավերին, և այս ուղղությամբ վերջին տարիներին մեծ աշխատանք է տարվել:
«Մեր ստեղծագործական խմբերը կանոնավոր շրջայցեր են կազմակերպում շրջաններ: Պետք է առավել, քան երբևէ ուշադրություն դարձնել Արցախի սահմանամերձ գոտիներին և վերաբնակեցված շրջաններին: Այս քաղաքականության մեջ կարևոր է նաև մշակույթի առանձին բաժինների հավասար ֆինանսավորումը, որպեսզի այն ապահովի բոլոր ժանրերը ներկայացնող ստեղծագործական խմբերին»,- ասել է Ս. Շահվերդյանը և ընդգծել, որ այս առումով կարևոր խնդիր է նաև մշակութային բոլոր խմբերին հավասարապես ինքնադրսևորվելու հնարավորություն տալը:
Անդրադառնալով Ստեփանակերտի Վահրամ Փափազյանի անվան դրամատիկական թատրոնի շենքի վերականգնման մասին հարցին՝ նախարարը նշել է, որ անհրաժեշտ են հսկայական ներդրումներ և այդ միջոցները դեռևս չկան:
Լրագրողների կողմից հարց հնչեցվեց նաև Հադրութի Արթուր Մկրտչյանի անվան թանգարանի շենքի վերանորոգման և Շուշիի Ռեալական ուսումնարանի վերականգնման մասին: Նախարարը նշեց, որ այդ խնդիրները ևս մշտական ուշադրության կենտրոնում կլինեն:
Ս. Շահվերդյանը անդրադարձել է նաև ներհամայնքային մշակութային կյանքը զարգացնելուն: «Հադրութի և Մարտունու շրջաններում արդեն կատարվել են ուսումնասիրություններ: Որոշ համայնքներում ակումբներ չկան, ինչը ևս խոչընդոտում է մշակութային կյանքի զարգացմանը»,- նշել է Ս. Շահվերդյանը և այս գործում կարևորել շրջվարչակազմերի ղեկավարների մասնակցությունը՝ մեր երկրի ապագա սերնդի մշակութային ակտիվ կյանքն ապահովելու համար:
