ԱՀ կառավարության և «ԱՐԻ» բարեգործական հիմնադրամի համաֆինանսավորմամբ Քաշաթաղի շրջանի Աղավնո համայնքի Արիավանի նոր բնակելի թաղամասում երկրորդ փուլով կառուցվող 25 առանձնատներն ավարտման փուլում են. դրանք շահագործման են հանձնվելու 2018 թվականի գարնանը:
2018 թվականին Աղավնոյում շահագործման կհանձնվի ևս 25 առանձնատուն
ՍՏԵՓԱՆԱԿԵՐՏ, 20 դեկտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Քաշաթաղի շրջվարչակազմի աշխատակազմի ղեկավար Դավիթ Դավթյանը:
Նա նշել է, որ առաջին փուլում արդեն իսկ շահագործման է հանձնվել 25 առանձնատուն: Ըստ Դ. Դավթյանի՝ ներկայումս էլ կատարվում են առանձնատների ներքին հարդարման աշխատանքները:
Մեր զրուցակցի խոսքով՝ կառուցվող առանձնատները հատկացվելու են բազմազավակ ընտանիքներին, զինվորականներին, սիրիահայերին:
«Արիավան թաղամասում առանձնատների կառուցման ծրագիրը շարունակական բնույթ է կրելու: 2018 թվականին նախատեսվում է ևս 16 նոր առանձնատուն կառուցել: Նման ծրագրերով փորձում ենք լուծել վերաբնակիչների և տեղում ապրող ընտանիքների բնակարանային խնդիրները»,-ավելացրել է Դ. Դավթյանը:
Նշենք, որ «ԱՐԻ»-ն հիմնադրվել է 2009 թվականին լիբանանահայ գործարարների կողմից՝ Արցախի Հանրապետության Քաշաթաղի և Շահումյանի շրջանների գյուղատնտեսությունը զարգացնելու նպատակով:
Այս շրջանների բնակիչները 2010 թվականից օգտվում են ընկերության՝ նպատակային փոխառությամբ տրամադրվող ֆինանսական միջոցներից: 6 տարիների ընթացքում «ԱՐԻ»-ն «Գյուղի և գյուղատնտեսության հիմնադրամի» միջոցով Քաշաթաղի ու Շահումյանի շրջաններում շուրջ 1 միլիարդ 260 միլիոն դրամի ծրագրեր է իրականացրել՝ արտոնյալ պայմաններով փոխառություններ տրամադրելով ավելի քան 1000 ընտանիքների: Ավելի ուշ ընկերությունն ընդլայնել է ներդրումների շրջանակը՝ ԱՀ կառավարության հետ համատեղ մասնակցելով Աղավնոյում իրականացվող բնակարանաշինության ծրագրին: