Քաշաթաղի շրջանի երկրագիտական թանգարանում, նախօրեին Ոսկեդարին նվիրված՝ դասախոսություն-քննարկում է կազմակերպվել։
Քաշաթաղի շրջանի երկրագիտական թանգարանում Ոսկեդարին նվիրված՝ դասախոսություն-քննարկում է կազմակերպվել
ՍՏԵՓԱՆԱԿԵՐՏ, 25 դեկտեմբերի, ԱՐՑԱԽՊՐԵՍ: «Արցախպրես»-ի հետ զրույցում թանգարանի տնօրեն Մուշեղ Ալավերդյանն ասել է, որ միջոցառումը կազմակերպվել է Բերձորի Վահան Թեքեյանի անվան թիվ 1 դպրոցի հետ, որին մասնակցել են ավագ դասարանի աշակերտները:
Բանախոսը եղել է Արցախի պետական համալսարանի պատմության ամբիոնի ավագ դասախոս Լեռնիկ Հովհաննիսյանը, ով նաև Քաշաթաղը ներկայացնում է Խորհրդարանում՝ որպես շրջանից մեծամասնական ընտրակարգով ընտրված պատգամավոր: Միջոցառմանը նախ հանդես է եկել Լ. Հովհաննիսյանը՝ ներկաներին պատմելով Ոսկեդարի նշանակությունն ու կարևորությունը հայ պատմագրության մեջ: Ապա աշակերտները ներկայացրել են 5-րդ դարի պամիչներ Ագաթանգեղոսի, Բուզանդի, Կորյունի, Եղիշեի, Փարպեցու աշխատությունների, դրանց առանձնահատկությունների մասին իրենց գիտելիքները: Գրաբարով ներկայացվել են նաև մի քանի գրական ստեղծագործություններ:
Մեր զրուցակցի խոսքով՝ հանդիպումն արդյունավետ է եղել և հետագայում ևս ծրագրում են նմանօրինակ միջոցառումներ կազմակերպել: «Ընդհանրապես ժամանակակից թանգարաններում ընդունված է այս ֆորմատով միջոցառումներ կազմակերպել: Կարծում եմ՝ միջոցառումը լավ նախադեպ է, և ապագայում կփորձենք այսօրինակ միջոցառումների կազմակերպումը դարձնել պարբերական բնույթ»,- ասել է Քաշաթաղի շրջանի երկրագիտական թանգարանի տնօրենը: