Արցախի ժողովրդական երգչուհի, ՀՀ վաստակավոր արտիստ, «Հայաստանի պետական ֆիլհարմոնիա»-յի Արցախի մասնաճյուղի մանկապատանեկան խմբի տնօրեն և գեղարվեստական ղեկավար Նաիրուհի Ալավերդյանն այսօր էլ շարունակում է իր ներդրումը բերել Արցախի մշակութային կյանքում՝ իր սաներին ու ժողովրդին փոխանցելով հայ երգի անմահ գանձերը:
Հայ երգը մարդու մեջ պիտի սերմանվի մանուկ հասակից. Նաիրուհի Ալավերդյան
ՍՏԵՓԱՆԱԿԵՐՏ, 16 հունվարի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Նաիրուհի Ալավերդյանն պատմել է, որ ինքը դեռ մանկուց շատ է սիրել երգել ու պարել: Նա շուրջ 20 տարի հանդես է եկել Արցախի բեմահարթակներում՝ իր պարով հիացնելով հանդիսատեսին:
«Ես այնքան եմ տարված եղել պարարվեստով, որ չեմ էլ պատկերացրել, որ մի օր դառնալու եմ հանրահայտ երգչուհի:Ինձ միշտ թվացել է, որ պարն է իմ տարերքը:Սակայն, երբ 1968 թվականին ավարտեցի Ստեփանակերտի Կոմիտասի անվան երաժշտական ուսումնարանի դասական-վոկալ բաժինը, սկսեցի զբաղվել միայն երգարվեստով:Արվեստի այս ճյուղը կարծես մի անծայրածիր օվկիանոս է, ուր մտնողը չի կարողանաում հագեցնել իր ծարավը:
Իմ կարծիքով՝ մարդ պետք է միշտ կարողանա իր տեղն ու դերը գտնել կյանքում, կատարել մասնագիտական այնպիսի ընտրություն,որին կոչված է ինքը:Այդպես միայն նա կկարողանա իր ավանդն ու ներդրումը բերել սերունդներին»,- ասել է Ն. Ալավերդյանը:
Արցախի երաժշտական կյանքում Ն. Ալավերդյանի երազանքները կատարվել են:
Նա դեռևս մանկուց տարված է եղել հայկական ժողովրդական երգարվեստով, կատարել է շատ ժողովուրդների երգեր, բայց իր հոգու խորքում միշտ էլ առանձին տեղ են գրավել դարերով հղկված, զուլալված ու մեզ հասած հայկական ժողովրդական, գուսանական երգերը:
Խոսելով երիտասարդ արվեստագետների մասին՝ նա հպարտորեն նշել է, որ ինքն անչափ ուրախ է Արցախի երիտասարդ, տաղանդաշատ արվեստագետներով, ովքեր, մասնակցելով միջազգային տարբեր մրցույթների, միշտ էլ արժանանում են պարգևների և բարձր պահում Արցախի անունն ու պատիվը:
«Այո՛, Արցախում, իրոք, կան տաղանդաշատ երիտասարդներ և ես հպարտ եմ նրանցով,-ընդգծել է երգչուհին ու հիշել,- ես ևս հյուրախաղերով ժամանակին հանդես եմ եկել աշխարհի տարբեր երկրներում՝ Ֆրանսիայում, Հունաստանում, Բուլղարիայում, Իրանի Իսլամական Հանրապետությունում և այլուր»:
Մեր զրուցակցի խոսքով՝ երգարվեստն իր էությունն է, իր կյանքի իմաստը, և եթե ինքը մանկանա և նորից մասնագիտություն ընտրելու հնարավորություն ունենա, անշուշտ, վերստին կընտրեր երգարվեստի ուղին:
Ն. Ալավերդյանի կարծիքով՝ հայ երգը մարդու մեջ պիտի սերմանվի մանուկ հասակից:
«Երբ 2014 թվականին ստեղծվել է «Հայաստանի պետական ֆիլհարմոնիա»-ի Արցախի մասնաճյուղը, նրա մասնակիցները համերգային ծրագրերով այսօր էլ շարունակում են հանդես գալ Արցախի տարբեր շրջաններում և հայկական երգարվեստը տարածում ամենուր»,-ասել է հանրահայտ երգչուհին:
Խոսելով առաջիկա անելիքների մասին՝ նա նշել է, որ 2018 թվականին համերգային հարուստ ծրագրերով ևս շարունակելու են իրենց առաքելությունը:
