Հունվարի 9-ից մեկնարկել է «Դասավանդի՛ր Հայաստան» առաջնորդության զարգացման ծրագրի մասնակցության հայտադիմումների ընդունումը, որին ԱՀ-ից և ՀՀ-ից կարող են մասնակցել բոլոր ցանկացողները՝ անկախ մասնագիտությունից և աշխատանքային փորձից:
«Դասավանդի՛ր Հայաստան»-ը հայտադիմումներ է ընդունում
ՍՏԵՓԱՆԱԿԵՐՏ, 16 հունվարի, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Դասավանդի՛ր Հայաստան» ծրագրի մարքեթինգի և հաղորդակցման համակարգող Տաթևիկ Ղազարյանն ասել է, որ ծրագրին մասնակցելու համար հայտադիմումների ընդունման գործընթացը տևելու է մինչև ապրիլի 30-ը՝ չորս փուլով։ Մասնակցության համար անհրաժեշտ է www.teachforarmenia.org կայքում սեղմել «Դիմի՛ր, հիմա» կոճակն ու լրացնել հայտադիմումը։ Արդյունքում ընտրված մասնակիցներին պաշտոնապես ուղարկվելու է ծրագրին մասնակցելու հրավեր:
Դասավանդման երկու տարիների ընթացքում մասնակիցները ստանում են մանկավարժի որակավորում՝ սովորելով ԲՈՒՀ-ում։ Մագիստրոսի կոչում ստանալու բոլոր ծախսերը հոգում է հիմնադրամը։
Տ. Ղազարյանի խոսքով՝ ծրագիրը միտված է բացահայտելու երիտասարդների մասնագիտական և առաջնորդական ներուժը՝ միաժամանակ նպաստելով գյուղական համայնքների զարգացմանը:
Նա կարևորել է, որ նախաձեռնությանը դիմելու պահին մասնակցի՝ մանկավարժի որակավորում ունենալը պարտադիր չէ. հարկավոր է ունենալ առնվազն բակալավրի աստիճան, գերազանց տիրապետել հայերենին, ինչպես նաև ունենալ անգլերենի բազային գիտելիքներ։
«Արդեն ունենք 71 մասնակից Հայաստանի տարբեր մարզերում, ինչպես նաև 14 շրջանավարտ, որոնք ավարտել են երկամյա ծրագիրը։ Մասնակիցներից յուրաքանչյուրն աշխատում է դպրոցում, ակտիվ ներգրավված է համայնքի առօրյային, մասնակցում է միջոցառումներին ու նպաստում տվյալ համայնքի զարգացմանը: Այս պահին կան ծրագրում ընդգրկվածներ, ովքեր ծնունդով Արցախից են կամ ապրել են այստեղ»,- ասել է Տ. Ղազարյանը և ավելացրել, որ ծրագրի մասնակից ընտրվելուց հետո բոլորն անցնում են ինտենսիվ վերապատրաստում՝ Ամառային ինստիտուտի շրջանակում։
5-շաբաթյա տևողությամբ այդ վերապատրաստման ընթացքում նրանք ձեռք են բերում դասավանդման հմտություններ, մասնակցում են դասերի, աշխատում աշակերտների հետ, պատրաստվում իրենց դասավանդմանը, վարպետության դասեր ունենում հատուկ մասնագետների մատուցմամբ:
Տ. Ղազարյանի խոսքով՝ վերապատրաստումով ոչինչ չի սահմանափակվում: Յուրաքանչյուր մասնակցի հիմնադրամի կողմից կցվում է առաջնորդության զարգացման մենեջեր (մենթոր), որը կրթության ոլորտում երկար տարիների աշխատանքային փորձ ունեցող մասնագետ է:
Նա նշել է նաև, որ ծրագրի տեւողությունը երկու տարի է, որի ավարտից հետո մասնակիցները ձեռք են բերում «Դասավանդի'ր, Հայաստան»-ի կրթության հավասարության դեսպանների կոչումը. ծրագրի շրջանավարտների հատուկ բաժինն աշխատում է նրանց հետ, օգնում է կարիերայի հետագա զարգացման հարցում, ուղղորդում գործընկեր կազմակերպություններ։
Տ. Ղազարյանի խոսքով՝ հիմնադրամը չի տրամադրում կացարան, սակայն յուրաքանչյուր ամիս մասնակիցներին ցուցաբերում է դրամական օգնություն, որպեսզի նրանք կարողանան հարմարվել նոր համայնքում եւ հոգալ բնակության հարցը։
Նշենք, որ «Դասավանդի’ր, Հայաստան»-ը կրթական հիմնադրամ է, որը գործում է 2014 թվականից եւ իրականացնում է առաջնորդության զարգացման երկամյա ծրագիր։ Հիմնադրամը ստեղծել և ղեկավարում է երիտասարդ սոցիալական ձեռներեց Լարիսա Հովաննիսյանը։