Լեռնային Ղարաբաղի Հանրապետության մշակույթի և երիտասարդության հարցերի նախարար Նարինե Աղաբալյանի` Ֆրանսիա կատարած այցելության շրջանակներում Բուկ Բել Էրի քաղաքապետարանում նոյեմբերի 19-ին ստորագրվել է բարեկամության հռչակագիր՝ Լեռնային Ղարաբաղի Ասկերան և Ֆրանսիայի Բուկ Բել Էր քաղաքների միջև։
Ասկերանն ու Ֆրանսիայի Բուկ Բել Էր քաղաքը բարեկամության հռչակագիր են ստորագրել
ՍՏԵՓԱՆԱԿԵՐՏ, 20 ՆՈՅԵՄԲԵՐԻ, ԱՐՑԱԽՊՐԵՍ: ԼՂՀ ԱԳՆ մամլո ծառայության փոխանցմամբ՝ հռչակագիրը ողջունում է ազատ և ժողովրդավարական հասարակություն ստեղծելու և զարգացնելուն ուղղված Լեռնային Ղարաբաղի ժողովրդի և իշխանությունների հետևողական քայլերը և անընդունելի է համարում Արցախի ժողովրդի մեկուսացումը աշխարհից։
Այն նպատակ ունի ամրապնդելու երկու քաղաքների միջև բարեկամական կապերը և համատեղ համագործակցություն հաստատելու կրթության, մշակույթի և սպորտի բնագավառներում:
Ստորագրման արարողության ավարտին ԼՂՀ մշակույթի նախարար Նարինե Աղաբալյանը, Բուկ Բել Էրի քաղաքապետ Ռիշար Մալիեն, Ֆրանսիայում ԼՂՀ մշտական ներկայացուցիչ Հովհաննես Գևորգյանը և Մարսելում Հայաստանի Հանրապետության փոխհյուպատոս Սամվել Լալայանը մասնակցել են Բուկ Բել Էրի քաղաքապետարանի աջակցությամբ կազմակերպված «Արցախի ձայներ» խմբի համերգին: