Այսօր՝ փետրվարի 16-ին, Արցախի պետական համալսարանում պատմաիրավաբանական ֆակուլտետի և Հայագիտական կենտրոնի նախաձեռնությամբ ուսանողների հետ հանդիպել են Ղարաբաղյան շարժման ակտիվիստներ Արկադի Կարապետյանը և Վալերի Ղազարյանը:
ԱրՊՀ-ում տեղի է ունեցել հանդիպում Արցախյան շարժման ակտիվիստների հետ
ՍՏԵՓԱՆԱԿԵՐՏ, փետրվարի 16, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ հանդիպմանն ԱրՊՀ ուսանողների, շրջանավարտների և հասարակայնության հետ տարվող աշխատանքների գծով պրոռեկտոր Վիտյա Յարամիշյանն ասել է, որ, Արցախյան շարժման 30-ամյակին նվիրված, մեր երկրում կազմակերպվում և անց են կացվում տարաբնույթ միջոցառումներ:
«Մենք մասնակիցը եղանք Արցախի պետական համալսարանի զանգվածային երթին. մոտավոր կրկնությունն այն իրադարձության, որը տեղի էր ունեցել ուղիղ 30 տարի առաջ: Ականատեսն ենք նաև տարբեր ձևաչափերով կազմակերպվող ամենատարբեր հանդիպումների՝ Արցախում, Հայաստանում և Սփյուռքում: Մեր համալսարանը եղել է առաջամարտիկ՝ Ղարաբաղյան շարժման գիտական հիմնավորման, նրա գաղափարների հանրահռչակման առումով: Այստեղ են ծնվել նորաստեղծ գաղափարներ, և այստեղ են ուսանողներն ու դասախոսները գծել իրենց ճանապարհը»,- նշել է Վ. Յարամիշյանը:
Ներկայացնելով Արցախյան շարժման սկզբնավորման պատմությունը՝ Արկադի Կարապետյանն ասել է, որ առաջին շարժումը սկսվել էր դեռևս Հայկ նահապետից:
«1988-ը շարժման մի էտապն էր: Այսօր էլ շարժումը շարունակվում է, և կան բազմաթիվ հարցեր, որոնք պետք է ճիշտ լուծում ստանան: Այն ժամանակ Ղարաբաղն անօրինական ձևով է հայտնվել Ադրբեջանի կազմում, և մինչ այսօր էլ Ադրբեջանը մեզ հետ չունի միջազգային օրենքներով հաստատված սահման»,- նշել է Ա. Կարապետյանը:
Նրա խոսքով՝ Հայաստանում լավ չէին պատկերացնում Արցախում տիրող իրավիճակը, ուստի իրենք որոշել էին համախմբվել և բոլոր հարցերը լուծել միասնական: «1987 թվականի հոկտեմբերին սկսվեց գործընթացը, և ես դարձա շարժումը նախաձեռնող բոլոր խմբերի կոորդինատոր: Այս տարի մենք վերջապես նշեցինք փետրվարի 13-ը, քանի որ փետրվարի 20-ը փետրվարի 13-ի հետևանքն է: Մեր օրերի հանրահավաքներն իրենց ծավալով պետք է նմանեցվեն 1988-ի շարժմանը»,- մասնավորապես ասել է Ա. Կարապետյանը:
Իսկ շարժման ակտիվիստ, ներկայումս «Հայաստան» համահայկական հիմնադրամի՝ ԼՂՀ-ում իրականացվող ծրագրերի համակարգող Վալերի Ղազարյանն էլ նշել է, որ ինքը 1988-ին աշխատում էր կուսակցության մարզկոմում:
«Դեռ դպրոցական տարիներին, երբ բացակայում էր հեռուստատեսությունը, հնարավորություն կար լսելու միայն «Ամերիկայի Ձայն» ռադիոկայանը: Ազգային ոգին այն ժամանակ կար: Արդեն 1979 թվականին հանրապետական հիվանդանոցում եղավ բախում թուրքերի ազդեցիկ գործակալներից մեկի հետ, որը ևս դարձավ շարժառիթ»,- ասել է Վ. Ղազարյանը՝ հավելելով, որ 1988 թվականն ազգային-ազատագրական պայքարի նոր փուլ է, և տարիների փորձը հուշում է, որ այսօր պետք է ուշադրություն դարձնել ձևակերպումներին, քանի որ ճիշտ քաղաքականության մշակման խնդիր կա նաև տեղեկատվական պատերազմում:
Հանդիպման ընթացքում շարժման ակտիվիստները պատասխանել են ուսանողների կողմից հնչեցված հարցերին:
