Հայ մեծ բանաստեղծ Հովհաննես Թումանյանի ծննդյան օրը՝ փետրվարի 19-ը, որպես գիրք նվիրելու օր, ՀՀ կառավարության նախաձեռնությամբ և Գրողների միության նախագահ Լևոն Անանյանի որոշմամբ Հայաստանում նշվում է 2008 թվականից, որին միացել է նաև Արցախը:
Ինչ միջոցառումներ են նախատեսվում Արցախում՝ նվիրված գիրք նվիրելու օրվան. անոնս
ՍՏԵՓԱՆԱԿԵՐՏ, փետրվարի 17, ԱՐՑԱԽՊՐԵՍ: Արցախի գրադարաններում յուրաքանչյուր տարի կազմակերպվում են հանրային ընթերցումներ, կրթական և մշակութային միջոցառումներ, հանդիպումներ գրողների հետ՝ նպատակ ունենալով կարևորել գրքի նշանակությունը հասարակության կյանքում:
«Արցախպրես»-ի թղթակցի հաղորդմամբ՝ տոնին նվիրված՝ այդ օրն Արցախում տեղի են ունենալու մի շարք միջոցառումներ, որոնց ցանկը ներկայացնում ենք ստորև:
Ժամը 11:00-ին ԱՀ մշակույթի, երիտասարդության հարցերի և զբոսաշրջության նախարարության ու ՀՅԴ Արցախի երիտասարդական միության նախաձեռնությամբ կկազմակերպվի գրքահավաք: Արցախում առաջին անգամ Ստեփանակերտի Վերածննդի հրապարակում տեղադրված է լինելու գրքի տաղավար (BookBank), որտեղ հավաքագրված գրականությունը կնվիրաբերվի Քաշաթաղի շրջանի Քաշունիք գյուղի միջնակարգ դպրոցի գրադարանին: Միջոցառմանը մասնակցելու են նաև սիրված հաղորդավարուհի, դերասանուհի Նազենի Հովհաննիսյանը և հայտնի երգչուհի Սոֆի Մխեյանը:
Նույն ժամին Գրիգոր Նարեկացի համալսարանը հյուրընկալելու է արդի պոետների, արձակագիրների, ուսանող-ստեղծագործողների և լրագրողների:
Ժամը 14:00-ին Ստեփանակերտի Մուրացանի անվան քաղաքային գրադարանում տեղի է ունենալու հանդիպում գրադարանի ակտիվ այցելուների հետ, ովքեր հանդես են գալու ելույթներով:
Նույն ժամին Արցախի պետական համալսարանի ընթերցասրահում ուսանողների հետ տարվող աշխատանքների, հանրային կապերի և լրատվության բաժնի ու գիտական գրադարանի կողմից տեղի է ունենալու քննարկում, որի ընթացքում գրադարանի կողմից գիրք է նվիրվելու նաև ամենաընթերցասեր ուսանողներին:
Արդեն ժամը 16:00-ին փոքրիկների համար Շուշիի «Նարեկացի» արվեստի միությունում ներկայացվելու է Հովհաննես Թումանյանի «Կիկոսը», «Ձախորդ փանոս», «Ծիտը» «Կացին ախպեր» հեքիաթների համանուն մուլտերը: Մուտքը՝ միայն գրքերով:
Նույն ժամին գիրք նվիրելու օրվան և Հովհաննես Թումանյանի ծննդյան 149-ամյակին նվիրված՝ գրական երաժշտական երեկո է տեղի ունենալու՝ Մ. Մաշտոցի անվան հանրապետական և Հ. Թումանյանի անվան հանրապետական մանկական գրադարանների ակտիվ ընթերցողների ներգրավմամբ: Նախատեսվում են նաև Արցախում ստեղծագործող գրողների ելույթներ և գրքերի նվիրատվություն գրադարանին ու ներկաներին:
Երեկոյան ժամը 19:00-ին Ստեփանակերտի «Արմատներ» (The Roots) կենսակենտրոնում կազմակերպվելու է թեմատիկ երեկո, որին մասնակցել ցանկացողները պետք է իրենց հետ բերեն առնվազն մեկ գիրք: Երեկոյի ընթացքում լինելու է գրքերի փոխանակում, որի ընթացքում մասնակիցները խոսելու են նաև գրքի կարևորությունից ու մեր օրերում գրքի ունեցած դերից: Վերջում մասնակիցները դիտելու և քննարկելու են օրվան համահունչ ֆիլմ՝ «451 աստիճան ըստ Ֆարենհայթի»: Մուտքը՝ միայն գրքերով: