ԱՀ կրթության, գիտության և սպորտի նախարարության լեզվի տեսչության և Ստեփանակերտի քաղաքապետարանի աշխատակազմի կրթության և սպորտի բաժնի համատեղ նախաձեռնությամբ այսօր մայրաքաղաքի Ալեքսանդր Գրիբոյեդովի անվան N3 միջնակարգ դպրոցում տեղի է ունեցել «Ոսկե բանալի» խորագրով քաղաքային գրական-երաժշտական ցերեկույթ՝ նվիրված մայրենի լեզվի միջազգային օրվան:
Ստեփանակերտում տեղի է ունեցել միջոցառում՝ նվիրված մայրենիի օրվան (լուսանկարներ)
ՍՏԵՓԱՆԱԿԵՐՏ, փետրվարի 21, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանն ԱՀ կրթության, գիտության և սպորտի նախարարության լեզվի տեսչության պետ Արտակ Ղուլյանը ողջունելով ներկաներին, իր խոսքում կարևորել է մայրենի լեզվի դերն ու նշանակությունը մարդու կյանքում:
«Այսօր ամբողջ աշխարհում նշվում է մայրենիի օրը. բոլոր ազգերն էլ իրենց մայրենին շատ են սիրում: Ինչ-որ տեղ գուցե սխալ է, որ տարվա մեջ մեկ անգամ ենք հիշում մայրենի լեզվի օրը, բայց մենք պետք է միշտ փառաբանենք, մեծարենք ու սիրենք մեր մայրենին և երբեք ու ոչ մի անգամ այն չաղավաղենք: Պետք է ապրենք ու շնչենք մեր մայրենիով: Մեր ազգի ինքնությունը, լինելիությունը պայմանավորված է լեզվով և մենք էլ այն պետք է փայփայենք, պահպանենք, հնչեցնենք և միշտ արժևորենք»,-մասնավորապես ասել է Ա. Ղուլյանը:
Մայրենիի միջազգային տոն օրվա առթիվ մայրենի լեզուն անաղարտ պահելու գործում ունեցած ավանդի համար Ա. Ղուլյանը Ստեփանակերտի Ալեքսանդր Գրիբոյեդովի անվան N3 միջնակարգ դպրոցին է հանձնել ԱՀ ԿԳՍ նախարարության պատվոգիրը:
Ցերեկույթին դպրոցի աշակերտները և ուսուցիչները հանդես են եկել մայրենի լեզվին նվիրված ասույթներով, բանաստեղծություններով, երգերով, ազգային պարերով:
Միջոցառմանը ներկա էին ԱՀ կրթության, գիտության և սպորտի նախարարության և Ստեփանակերտի քաղաքապետարանի աշխատակիցներ, ուսումնական հաստատությունների ներկայացուցիչներ, աշակերտներ և այլք:
Հիշեցնենք, որ Մայրենի լեզվի միջազգային օրն ընդունվել է ՅՈՒՆԵՍԿՕ-ի Գլխավոր համաժողովի 30-րդ նստաշրջանի որոշումով 1999 թվականի նոյեմբեր ամսին և նշվում է 2000 թվականի փետրվարի 21-ից, որպես մայրենի լեզուների իրավունքների ճանաչման և գործածության աջակցման օր։ Մայրենի լեզվի միջազգային օրը 2005 թվականից նշվում է նաև Հայաստանում և Արցախում: