ԱՀ մշակույթի, երիտասարդության հարցերի և զբոսաշրջության նախարարության նախաձեռնությամբ այսօր՝ փետրվարի 27-ին Ստեփանակերտի քաղաքային հուշահամալիրում տեղի է ունեցել ոգեկոչման արարողություն` ի հիշատակ սումգայիթյան ջարդերի անմեղ զոհերի:
Ստեփանակերտում տեղի է ունեցել ոգեկոչման արարողություն` ի հիշատակ սումգայիթյան ջարդերի (լուսանկարներ)
ՍՏԵՓԱՆԱԿԵՐՏ, փետրվարի 27, ԱՐՑԱԽՊՐԵՍ: Միջոցառումը անցկացվել է սումգայիթյան ջարդերի ընթացքում զոհված անմեղ հայորդիների հիշատակը հավերաժացնող հուշաքարի մոտ, որտեղ հավաքվել էին հարյուրավոր երիտասարդներ: Ստեփանակերտի Սրբ. Հակոբ եկեղեցու հոգևոր հովիվ, Տեր Մինաս քահանա Մովսիսյանը հոգեհանգստյան կարգ է մատուցել, որից հետո, ներկաները մոմեր են վառել սումգայիթյան ոճրագործության անմեղ զոհերի հիշատակին:
Այնուհետև ցուցադրվել է «Սովորական ցեղասպանություն. Սումգայիթ, 1988» փաստավավերագրական ֆիլմ:
«Արցախպրես»-ի թղթակցի հետ զրույցում ԱՀ մշակույթի, երիտասարդության հարցերի և զբոսաշրջության փոխնախարար Գայանե Գրիգորյանն ասել է, որ հարգանքի տուրք մատուցելով սումգայիթյան ոճրագործության զոհերի հիշատակին, դրանով իսկ դատապարտում են նման ոճրագործությունները:
Գ. Գրիգորյանի խոսքով՝ իրենք այս միջոցառմամբ ուզում են մերօրյա երիտասարդությանը իրազեկել 30 տարի առաջ Սումգայիթում տեղի ունեցածի մասին, որ նրանք երբևէ թույլ չտան հայ ժողովրդի նկատմամբ նման ոճրագործություններ իրականացվի:
«Ադրբեջանցիների կողմից 30 տարի առաջ հայերի նկատմամբ իրականացված ցեղասպանության հետևանքով ունեցել ենք հարյուրավոր զոհեր, վիրավորներ, բռնի կերպով տեղահանվածներ և խեղված ճակատագրեր: Ցավոք, այսօր այս ոճրագործությունն ինչպես հարկն է չի դատապարտվել. ոճրագործներն իրենց արժանի պատիժը դեռևս չեն կրել»,-նշել է Գ. Գրիգորյանը:
Ոգեկոչման արարողության մասնակից «Հայկի Սերունդ» հասարակական կազմակերպության փոխնախագահ Ռուբեն Հայրիյանն իր խոսքում ասել է. «Պետք է կարողանանք մեր ունեցած բոլոր փաստերն օգտագործել միջազգային հարթակներում՝ աշխարհին ցույց տալու և ապացուցելու համար, որ, իրոք, Սումգայիթում տեղի է ունեցել ցեղասպանություն»:
Ռ. Հայրիյանն ընդգծել է, որ Սումգայիթում կատարված ցեղասպանությունը պիտի դատապարտվի, որպեսզի աշխարհում և ոչ մի ժողովուրդ նման ողբերգություն չապրի:
Միջոցառմանը ներկա էին ԱՀ Ազգային ժողովի նախագահ Աշոտ Ղուլյանը, ԱՀ մշակույթի, երիտասարդության հարցերի և զբոսաշրջության նախարար Սերգեյ Շահվերդյանը, հասարակական կազմակերպությունների անդամներ, ուսանողներ, դպրոցականներ և այլք:
Հիշեցնենք, որ 1988թ. փետրվարի 27-ից Բաքվից 20 կիլոմետր հեռավորության վրա գտնվող Սումգայիթ քաղաքում ադրբեջանական իշխանություններն սկսեցին հայ բնակչության բնաջնջումը, որն ուղեկցվում էր հայերի ունեցվածքի թալանով և ոչնչացմամբ: ԽՍՀՄ ղեկավարության լռության պայմաններում երեք օրվա կոտորածների ընթացքում վիրավորվեցին և սպանվեցին բազմաթիվ մարդիկ, ընդ որում՝ սպանվածների մի մասը տանջամահ էր արվել, իսկ դիակներն այրել էին: