ԱՀ գյուղատնտեսության նախարարության սննդամթերքի անվտանգության պետական ծառայության (ՍԱՊԾ) նախաձեռնությամբ «Անվտանգ սնունդ, առողջ սերունդ» կարգախոսով այսօր կազմակերպվել է իրազեկման ակցիա՝ նվիրված սպառողների իրավունքների պաշտպանության միջազգային օրվան:
Ստեփանակերտում կազմակերպվել է իրազեկման ակցիա՝ նվիրված սպառողների իրավունքների պաշտպանության միջազգային օրվան (լուսանկարներ)
ՍՏԵՓԱՆԱԿԵՐՏ, մարտի 15, ԱՐՑԱԽՊՐԵՍ: ՍԱՊԾ աշխատակիցները հանդիպել են Ստեփանակերտի Խաչատուր Աբովյանի անվան N 1 հիմնական դպրոցի ուսուցիչների և աշակերտների հետ, ներկայացրել սպառողների իրավունքները, պատասխանել ներկաներին հետաքրքրող հարցերին և նրանց բաժանել իրենց ծառայության կողմից պատրաստված բուկլետներ:
Այնուհետև ծառայության աշխատակիցները և աշակերտներն այցելել են մայրաքաղաքի տարբեր հատվածներում տեղակայված 5 խանութ, շրջել փողոցներով՝ մարդկանց ևս բաժանելով բուկլետներ:
Նրանք նաև բոլոր խանութներում կպցրել են ԱՀ ԳՆ սննդամթերքի անվտանգության պետական ծառայությունում գործող թեժ գծի հեռախոսահամարների պաստառներ:
«Արցախպրես»-ի թղթակցի հետ զրույցում ԱՀ ԳՆ ՍԱՊ ծառայության աշխատակազմի սննդամթերքի անվտանգության որակի և օպերատիվ հսկողության տեսչության պետ Արթուր Ներսիսյանն ասել է, որ իրենց կողմից առաջին անգամ է նման լայնամասշտաբ միջոցառում կազմակերպվում:
Նրա խոսքով՝ նմանօրինակ միջոցառումներով իրենք փորձում են, որ սպառողներն ավելի իրազեկ լինեն իրենց իրավունքներին և կարողանան պաշտպանել իրենց:
Ըստ մեր զրուցակցի՝ սպառողն այնքանով է պաշտպանված, ինչքանով որ ինքն իրազեկված է:
Ա. Ներսիսյանը նշել է նաև, որ աշակերտներին ակցիային մասնակից անելը պատահակ չէր. այն նպատակ ունի երեխաներին՝ որպես սպառող, փոքրուց իրազեկել իրենց իրավունքների մասին՝ դրանով իսկ փորձելով իրավագիտակցության մակարդակը բարձրացնել սննդամթերքի անվտանգության ասպարեզում:
Նա հորդորել է բոլոր սպառողներին, որ սննդամթերքի անվտանգության ասպարեզում խախտումներ նկատելու դեպքում անհապաղ դիմել ՍԱՊ ծառայություն կամ զնագահարել շուրջօրյա գործող թեժ գիծ՝ 50-99 կարճ համարին:
Ստեփանակերտի «Հաղթանակ» սուպերմարկետի սպառող Սվետլանա Բաբայանը ողջունել է ակցիայի նախաձեռնությունը և ասել, որ ինքը՝ որպես սպառող, տեղյակ չէր իր իրավունքների մասին:
Ս. Բաբայանը նաև նշել է, որ ՍԱՊ ծառայության կողմից իրեն տրամադրված բուկլետով հետագայում ինքը կառաջնորդվի:
Մայրաքաղաքի «Գուրման» խանութի սպառող Սլավա Հովսեփյանը ևս ողջունել է նախաձեռնությունը և նշել, որ սպառողների իրավունքների մասին իմանալն անհրաժեշտ է բոլորին:
Նա ավելացրել է, որ ինքը վաղուց է ծանոթ սպառողների իրավունքների մասին և միշտ էլ առաջնորդվել է դրանով:
Տեղեկացնենք նաև, որ առաջիկայում Ստեփանակերտում և շրջաններում ևս այսօրինակ միջոցառումներ կկազմակերպվեն:
Նշենք, որ մարտի 15-ը համարվում է սպառողների իրավունքների պաշտպանության միջազգային օր: Դեռևս 1962 թվականի մարտի 15-ին ԱՄՆ նախագահ Ջոն Քենեդին ընդունեց օրինագիծ սպառողների իրավունքների մասին, որով սպառողի տեղեկացված լինելու և ազատ ընտրության իրավունքից զատ սահմանվեց նաև սպառողի լսելի լինելու իրավունքը և, ԱՄՆ Կոնգրեսի իր ելույթում առաջին անգամ բնորոշելով «սպառող» հասկացությունը, սահմանեց սպառողի տեղեկացված լինելու, անվտանգության, ընտրության, լսելի լինելու, վնասի փոխհատուցման, սպառողական ոլորտում կրթություն ստանալու հիմնական իրավունքները:
ԱՀ-ում սպառողների իրավունքներն ամրագրվել են 2002 թվականի մայիսի 31-ին՝ «Սպառողների իրավունքների պաշտպանության մասին» ԱՀ օրենքի ընդունմամբ:
