ԱՀ մշակույթի, երիտասարդության հարցերի և զբոսաշրջության նախարարությունը, հայտարարել է երիտասարդական ծրագրերի մրցույթ, որին կարող են մասնակցել երիտասարդության ոլորտում գործունեություն ծավալող, Արցախում գրանցված իրավաբանական անձինք:
Հայտարարվել է երիտասարդական ծրագրերի մրցույթ
ՍՏԵՓԱՆԱԿԵՐՏ, մարտի 23, ԱՐՑԱԽՊՐԵՍ: Այս մասին «Արցախպրես»-ին տեղեկացրին ԱՀ մշակույթի, երիտասարդության հարցերի և զբոսաշրջության նախարարությունից՝ ավելացնելով, որ մրցույթի նպատակն է աջակցել երիտասարդական հասարակական նախաձեռնությունների, ծրագրերի և միջոցառումների իրականացմանը:
Աղբյուրի հաղորդմամբ՝ մրցույթն անց է կացվելու մի շարք ուղղություններով, մասնավորապես՝ երիտասարդության համար ոչ ֆորմալ կրթական ծրագրերի իրականացում, երիտասարդների զբաղվածության խնդրի լուծում (երիտասարդության շրջանում ձեռնարկատիրական գործունեության խթանման միջոցառումների անցկացում), ժողովրդագրական իրավիճակի բարելավում, հասարակության մեջ ընտանիքի ինստիտուտի ամրապնդում, հոգևոր-մշակութային, հայրենասիրական դաստիարակություն, երիտասարդության խոցելի խմբերի ինտեգրում հասարակությանը, երիտասարդների ժամանցի կազմակերպում, հատկապես՝ շրջաններում և գյուղական վայրերում, կամավորական շարժման զարգացում, պետական ծրագրերի և միջոցառումների վերաբերյալ երիտասարդության տեղեկացվածության բարձրացում, Սփյուռքի հետ երիտասարդական համագործակցության զարգացում: Առաջնահերթություն կտրվի շրջանային ծրագրերին:
Նշենք, որ ծրագրերի հայտերն ընդունվում են մինչև մարտի 31-ը ներառյալ: Հայտերի ներկայացման և լրացուցիչ տեղեկությունների համար ցանկացողները կարող են դիմել ԱՀ մշակույթի, երիտասարդության հարցերի և զբոսաշրջության նախարարության աշխատակազմի երիտասարդության հարցերի բաժին՝ ք. Շուշի, փ. Հախումյան 28 հասցեով կամ զանգահարել (047)73-20-73, (047)73-40-73 հեռախոսահամարներով: