Այս տարի լրանում է ԱՀ պաշտպանության բանակի «Մարտիկ» պաշտոնաթերթի ստեղծման 25 ամյակը: Թերթի 1-ին համարը լույս է տեսել 1993 թվականի մարտի 16-ին: Ի սկզբանե այն կոչվում էր «Մարտական թերթիկ»:
ՊԲ «Մարտիկ» պաշտոնաթերթը 25 տարեկան է. անցածի ու ներկայի մասին պատմել է Սուրեն Սարումյանը
ՍՏԵՓԱՆԱԿԵՐՏ, մարտի 23, ԱՐՑԱԽՊՐԵՍ: «Արցախպրես»-ի թղթակցի հետ զրույցում ԱՀ ՊԲ տեղեկատվության և հասարակայնության հետ կապերի բաժնի պետի տեղակալ, թերթի նախկին խմբագիր Սուրեն Սարումյանն ասել է, որ «Մարտիկ»-ն իր կենսագրության ողջ ժամանակահատվածում եղել է մեր երկրի պաշտպանական ոլորտում տեղ գտնող կարևորագույն զարգացումների ոչ միայն արձանագրողն ու տարեգիրը, այլև մասնակիցն ու հանրահռչակողը:
«Ինչպես ցանկացած լրատվամիջոց, այնպես էլ «Մարտիկ»-ը, կարևոր դեր է ստանձնել, սակայն այդ դերը ժամանակի ընթացքում ենթարկվում է փոխակերպման: Քանի որ թերթի ստեղծման պահին լրատվության այլ աղբյուրներ չկային, իսկ եղածներն էլ դժվար հասանելի էին, թերթը առաջին հերթին ծառայում էր ռազմաճակատային տեղեկատվությունը հասարակությանը հասցնելուն, ինչպես նաև տեղեկատվություն էր տալիս ռազմաճակատի ընդհանուր պատկերի մասին, հրամանատարության որոշումները հասցնում էր անձնակազմին: Հրադադարի կնքումից հետո, բնականաբար, թերթի այդ գործառույթը փոխվեց, քանի որ այն սկսեց ավելի շատ լուսաբանել բանակաշինության գործընթացը, որն իր մեջ ներառում էր բազմաթիվ տարրեր՝ սկսած մարտական պատրաստության համակարգի կատարելագործումից, մինչև զինծառայողների բնակկենցաղային պայմանների բարելավումը: Բացի դրանից, ոչ պակաս կարևոր է նաև այն հանգամանքը, որ թերթում կան խորագրեր, որոնք նպատակաուղղված են զինծառայողների թե՛ հոգևոր դաստիարակությանը, թե՛ ժամանակակից ազգային մշակույթի և թե՛ քաղաքական ոլորտների տեղեկատվությունների տրամադրմանը»,- նշել է Ս. Սարումյանն՝ ավելացնելով, որ տարիների հետ փոխվել են թերթի խմբագրակազմն ու տեխնիկական հնարավորությունները, սակայն նույնն են մնացել նպատակները, որոնցով պայմանավորված է հայկական զինված ուժերի ամենահին պարբերականի գոյությունը:
Պաշտոնաթերթի առաջին խմբագիրը, որն այն ժամանակ կոչվում էր համակարգող, եղել է Վալերի Աթաջանյանը: Տարբեր ժամանակահատվածներում թերթը խմբագրել են Հրանտ Ալեքսանյանը, Վահրամ Աթանեսյանը, Մարսել Պետրոսյանը, Մհեր Հարությունյանը: Ներկայումս «Մարտիկ»-ի խմբագիրը Երազ Հարությունյանն է:
2018 թ.-ի մարտի 16-ի դրությամբ ստեղծագործական կոլեկտիվի ջանքերով ընթերցողի սեղանին է դրվել շուրջ 4000 տպաքանակով լույս տեսնող թերթի արդեն 1290-րդ համարը:
Ս. Սարումյանի խոսքով՝ ընթերցողների հիմնական շրջանակը զինվորականներն են: Հենց պաշտպանության բանակի շնորհիվ էլ թերթը հասանելի է դառնում նրանց՝ հասնելով մինչև մարտական դիրքեր: Ունի նաև քաղաքացիական բաժանորդներ:
Հարկ է ընդգծել, որ այսուհետ «Արցախպրես» լրատվական գործակալության կայքէջում հրապարակվելու են «Մարտիկ» երկշաբաթաթերթի նյութերը:
Անդրադառանալով համագործակցությանը՝ Ս. Սարումյանը նշել է, որ Արցախում գործող լրատվամիջոցների համագործակցությունը, բնավ, զարմանալի չէ՝ նկատի ունենալով թվով սահմանափակ լինելը:
«Գաղափարը բխում է օբյեկտիվ անհրաժեշտությունից և իրականությունից: Կարծում եմ՝ բանակային տեղեկատվությունն այսօր մեծ պահանջարկ է վայելում: Այդ առումով մեր համագործակցությունը փոխշահավետ է՝ միտված «Մարտիկ»-ի լսարանը մեծացնելուն»,- մասնավորապես ընդգծել է Ս. Սարումյանը:
Վերջում նշենք, որ «Արցախպրես» լրատվական գործակալությունը շնորհավորում է «Մարտիկ» պաշտոնաթերթի 25-ամյակը, մաղթում բեղուն և արդյունավետ գործունեություն:
