Հայաստանի և Ռուսաստանի հարաբերությունները դաշնակցության, ռազմավարական գործընկերության հարաբերություններ են։
Հայ-ռուսական հարաբերությունների վերջին տասնամյակն՝ ըստ Լավրովի
ՍՏԵՓԱՆԱԿԵՐՏ, ապրիլի 9, ԱՐՑԱԽՊՐԵՍ: Այս մասին, ինչպես տեղեկացնում է ՌԴ ԱԳՆ-ն, հայկական լրատվամիջոցներին տված հարցազրույցում ասել է ՌԴ ԱԳ նախարար Սերգեյ Լավրովը՝ խոսելով վերջին 10 տարիներին Հայաստանի և Ռուսաստանի երկկողմ հարաբերությունների մասին։ Նա նշել է, որ այս տերմինները ամրագրված են երկկողմ պայմանագրերով, ՀԱՊԿ-ի փաստաթղթերում։
«Այս կապերը ընդգրկում են պետությունների գործունեության բոլոր ոլորտներն՝ առանց բացառության, մեր երկրների կենսագործունեության բոլոր ոլորտները՝ անվտանգության ոլորտում քաղաքականությունից, արտաքին քաղաքականությունից մինչև մշակույթ, տնտեսություն, տեխնոլոգիական կոնտակտներ, հումանիտար կապեր, կրթություն և շատ այլ ոլորտներ։ 10 տարվա ընթացքում հարաբերություններն, ինչ խոսք, զարգացել են՝ մեր երկրների ղեկավարների՝ Վլադիմիր Պուտինի և Սերժ Սարգսյանի անմիջական վստահելի շփումների ազդեցության տակ»,- ասել է նա՝ հավելելով, որ երկու նախագահները պարբերաբար՝ տարին մի քանի անգամ, բարձր մակարդակով հանդիպումներ են անցկացնում, շփվում են Հայաստանի Հանրապետության, Ռուսաստանի Դաշնության տարածքում, բազմաթիվ միջազգային համաժողովներում։
Լավրովն ընդգծել է Հայաստանի՝ ԵՏՄ-ին անդամակցումը, ինչն, ըստ նախարարի, լրացուցիչ, շատ ուժեղ խթան է հաղորդել մեր առևտրատնտեսական, ներդրումային համագործակցությանը։
«Բավական է ասել, որ նախորդ տարի Հայաստանի և Ռուսաստանի միջև առևտրաշրջանառությունը մեծացել է ավելի քան 30 տոկոսով՝ 2016 թ.-ից, հասնելով, եթե հիշողությունս ինձ չի դավաճանում, 1 մլրդ 750 միլիոն դոլլարի։ Սա շատ խոշոր գումար է, էլ չասած այն մասին, որ ռուսական մասնակցությամբ, ռուսական կամ ռուս-հայկական հարյուրավոր կազմակերպություններ աշխատում են Հայաստանի Հանրապետությունում և օգուտ են բերում մեր կապերին և մեր դաշնակցի տնտեսությանը»,- նշել է նա։
Ռազմատեխնիկական համագործակցությունն, ըստ Լավրովի, ավանդաբար սերտ է, իսկ առևտրատնտեսական համագործակցության գծով աշխատող Միջկառավարական հանձնաժողովին զուգահեռ կա նաև ռազմատեխնիկական համագործակցության հարցով հանձնաժողով. նրանք աշխատում են ակտիվորեն և լավ արդյունք են տալիս։
ՌԴ արտաքին գերատեսչության ղեկավարի գնահատմամբ՝ հումանիտար ոլորտը ավանդաբար մեծ պահանջարկ է ունեցել մեր ժողովուրդների շրջանում. նա առանձնացրել է աշնանը Ռուսաստանում անցկացված Հայաստանի մշակույթի օրերը, որի բացմանը՝ 2017-ի նոյեմբերին, ներկա էին երկու երկրների ղեկավարները։
Կրթության ոլորտին անդրադառնալով՝ Լավրովը նշել է, որ Երևանում գործում է Ռուս-հայկական (Սլավոնական) համալսարան։ Նրանում, ինչպես նաև ռւսական բարձրագույն ուսումնական հաստատությունների ութ մասնաճյուղերում, որոնք գործում են ՀՀ տարածքում՝ ռուսական բարձրագույն կրթության ծրագրով սովորում են ՀՀ շուրջ 3,5 հազար քաղաքացիներ։ Բացի դրանից, 5.5 հազար հայեր սովորում են Ռուսաստանի Դաշնությունում, նրանցից 1,5 հազարը՝ ՌԴ կառավարության կողմից Հայաստանին տրված պետական կրթաթոշակներով։
«Մեր երկկողմ հարաբերություններում վերջին տասը տարում, անխոս, շատ կայուն և որակյալ աճ է գրանցվում։ Այն լրացվում է արտաքին քաղաքական հարթակում սերտ համագործակցությամբ։ Մենք դաշնակիցներ ենք ՀԱՊԿ-ի շրջանակներում։ Ես արդեն նշել եմ ԵՏՄ-ն, որտեղ Հայաստանը դարձել է լիիրավ անդամ։ Իհարկե, ամբողջապես իրենց արդիականությունը պահպանում են նաև ԱՊՀ-ն, ինչպես նաև մեր կոորդինացված գործողությունները ՄԱԿ-ում, ԵԱՀԿ-ում, Եվրոպայի խորհրդում և Սևծովյան տնտեսական համագործակցության կազմակերպությունում»,- ասել է նա
Լավրովն ընդգծել է՝ վերոնշյալն ամենևին էլ ամբողջը չէ, ինչ բնորոշում է վերջին 10 տարիներին մեր երկրների հարաբերությունները, բայց կարծում է՝ ասվածից կարելի է եզրակացնել՝ որքան հարուստ են այդ կապերը և որքան են համապատասխանում մեր երկրների շահերին՝ այս պահին։
