Գերմանիայի Դաշնային հանրապետության Բունդեսթագում 92 մանդատ ունեցող «Այլընտրանք Գերմանիայի համար» կուսակցության հետ մեր հարաբերությունները սկսել են զարգանալ 2015թ.-ից, երբ «Ազատ հայրենիք» կուսակցության հրավերով մեր երկրում անցկացված խորհրդարանական ընտրություններին այդ կուսակցությունից դիտորդական պատվիրակություն ժամանեց Արցախ:
Գերմանացի մեր գործընկերների հետ փորձում ենք քաղաքական օրակարգ ձևավորել. Գագիկ Պետրոսյան
ՍՏԵՓԱՆԱԿԵՐՏ, ապրիլի 10, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է աշխատանքային այցով օրերս Գերմանիայի Դաշնային և Լեհաստանի հանրապետություններ այցելած ԱԺ պատգամավոր Գագիկ Պետրոսյանը:
Խորհրդարանական ամենամեծ՝ «Հայրենիք» խմբակցության ներկայացուցիչն, անդրադառնալով իր եվրոպական այցելություններին, մասնավորապես նշել է, որ շատ կառուցողական հանդիպմներ են կայացել: «Մարտի 29-ին Խորհրդարանի փոխնախագահ Վահրամ Բալայանի և ԳԴՀ-ում Արցախի ներկայացուցիչ Հարություն Գրիգորյանի հետ Բեռլինում այցելել ենք Բունդեսթագ, որտեղ «Այլընտրանք Գերմանիայի համար» կուսակցության կողմից Բունդեսթագի պատգամավոր ընտրված Շտեֆեն Կորտեի կողմից արժանացել ենք պաշտոնական ընդունելության: Հատկանշական է, որ հանդիպմանը մասնակցելու համար Բրանդենբուրգ երկրամասից ժամանել էին նաև երկրամասային օրենսդիր մարմնի պատգամավորներ Անդրեաս Կալբիցը և Անդրեաս Գալաուն: Նշված երեք պատգամավորներն էլ 2015թ.-ին այցելել էին Արցախ, որից հետո բարեկամական շփումները շարունակվել են: Մասնավորապես՝ Անդրեաս Կալբիցի հրավերով մեր կուսակցության ներկայացուցիչը 2016թ.-ին Բադեն-Վյուրտենբերգ երկրամասում անցկացված խորհրդարանական ընտրություններին դիտորդական առաքելություն է իրականացրել:
Այս ամենը հաշվի առնելով՝ մենք շատ կարևոր և կառուցողական զրույց ենք ունեցել: Քննարկել ենք միջկուսակցական հետաքրքրություն ներկայացնող հարցեր: Հատկապես ընդգծվել է երկկողմ քաղաքական օրակարգ ձևավորելու անհրաժեշտությունը: Մեզ համար շատ կարևոր էր 2017թ.-ին մեր գործընկերների Բունդեսթագում հայտնվելու փաստը և, հակառակ պնդումներին, որպես ընդդիմություն՝ նրանց ծայրահեղական չլինելը: Իրենց չափավոր աջակողմյան լինելու մասին նրանք վերահաստատեցին նաև մեզ հետ հանդիպմանը»,- ասաց Գ. Պետրոսյանը և մանրամասնեց, որ բացի պաշտոնական շփումներից գերմանացի գործընկերները իրենց պատվին ընթրիք են կազմակերպել, փոխանակվել հուշանվերներով:
Գերմանացի գործընկերների հետ հանդիպումները, սակայն այսքանով չեն սահմանափակվել: Նոյենկիրխենի իր բնակարանում մարտի 31-ին արցախցի խորհրդարանականներին ընդունել է «Այլընտրանք Գերմանիայի համար» կուսակցությունից Բունդեսթագի պատգամավոր ընտրված Վալդեմար Հերդթը: «Սեփական օջախում օտարերկրյա պատվիրակությանը հյուրընկալելը ինչպես մեզ մոտ, այնպես էլ Գերմանիայում մեծ հարգանքի նշան է: Պարոն Հերդթը վստահեցրեց, որ մենք կարող ենք համատեղ աշխատել, ինչը հեռանկարում անպայման հաշվի ենք առնելու»,- նշեց պատգամավորը:
Գ. Պետրոսյանի տեղեկացմամբ՝ հետաքրքիր հանդիպում են ունեցել նաև Գերմանիայում ՀՀ դեսպան Աշոտ Սմբատյանի հետ, որի ընթացքում մտքեր են փոխանակվել ղարաբաղյան հիմնախնդրի, տարածաշրջանային մարտահրավերների, Արցախի տնտեսության և մշակութային ծրագրերի վերաբերյալ:
Ըստ մեր զրուցակցի՝ գերմանական ուղևորության վերջին կանգառը հայկական էր: Մասնավորապես՝ Քյոլն քաղաքում նրանք հանդիպել են հայ համայնքի հետ և մասնակցել նրանց կողմից կազմակերպված Սուրբ Զատիկի միջոցառմանը, որտեղ ներկա էր նաև ՀՀ սփյուռքի նախարար Հրանուշ Հակոբյանի գլխավորած պատվիրակությունը:
Խոսելով Լեհաստանում ունեցած աշխատանքային օրակարգի մասին՝ ԱԺ պատգամավորը նշեց, որ նախ հանդիպել է Լեհաստանի Հանրապետությունում ՀՀ արտակարգ և լիազոր դեսպան Էդգար Ղազարյանին: «Պարոն դեսպանի հետ շատ կարևոր հանդիպում եղավ: Մենք քննարկեցինք Լեհաստանի և Արցախի միջև շփումները զարգացնելու, հատկապես գյուղատնտեսական ոլորտում հարաբերություններն ակտիվացնելու վերաբերյալ հարցեր: Թերևս, նշված հարցերի առաջնահերթություններով պայմնավորված, Լեհաստանում հաջորդ հանդիպումներս եղան գյուղոլորտում հայտնի մի շարք ֆերմերների և, հատկապես, Մազովեցի վոևոդության բարձրաստիճան մի շարք ղեկավարների հետ, որոնց հետ կոնկրետ պայմանավորվածություններ են ձեռք բերվել համագործակցության հարցերի շուրջ»,- ասել է Գ. Պետրոսյանը և ավելացրել, որ նշված երկրների հետ փոխգործակցության զարգացումը բխում է Արցախի շահերից և «Ազատ հայրենիք»-ը կուսակցական մակարդակում շարունակելու է ջանքեր գործադրել բոլոր պայմանավորվածությունները գործնական շփումների վերածելու համար:
