Արցախի պետական համալսարանի աստղադիտարանը կտեղափոխվի Ստեփանակերտի Հովհ. Թումանյանի անվան N9 հիմնական դպրոց:
ԱրՊՀ-ի աստղադիտարանը կտեղափոխվի Ստեփանակերտի N9 հիմնական դպրոց
ՍՏԵՓԱՆԱԿԵՐՏ, ապրիլի 19, ԱՐՑԱԽՊՐԵՍ: Այս մասին այսօր ԱՀ կրթության, գիտության և սպորտի նախարարության հրավերով Արցախում գտնվող Բյուրականի աստղագետների հետ հանդիպմանն ասել է ԿԳՍ նախարար Նարինե Աղաբալյանը և նշել, որ Ստեփանակերտի 9-րդ դպրոցի կտուրից բավականին հետաքրքիր տեսարան է բացվում դեպի ամբողջ քաղաք, որի համար էլ վայրն ընտրել են հենց այնտեղ:
Նրա խոսքով՝ ԿԳՍ նախարարությունը շահագրգռված է, որ Արցախը համագործակցի Բյուրականի աստղադիտադարանի հետ, քանի որ այն խթան կհանդիսանա աշակերտների մոտ հետաքրքրություն առաջացնելու դեպի աստղագիտությունը:
«Այս տարվանից Արցախի դպրոցներում սկսկել ենք մասնագիտական կողմնորոշման ծրագրերի իրականացման աշխատանքներ, որի մի ուղղությունն էլ աստղագիտությունն է: Մենք համագործակցելու ենք Բյուրականի աստղագիտարանի կողմից կազմակերպվող կրթական ծրագրերին, կազմակերպելու ենք փոխայցելություններ, ինչպես նաև Արցախում իրականացնելու ենք գիտական ծրագրեր»,-մասնավորապես ասել է Ն. Աղաբալյանը:
«Արցախպրես»-ի թղթակցի հետ զրույցում Բյուրականի աստղադիտարանի տնօրեն Արեգ Միքայելյանն ասել է, որ իրենց այցի նպատակն է, որ ԱրՊՀ-ի աստղադիտարանի տեղափոխումն ճիշտ իրականացվի: Դրա համար նախատեսել են նախագծեր և պլանավորվել կառուցել դիտահարթակ:
Ըստ տնօրենի, եթե համալսարանում ուսումնասիրվեր աստղագիտություն առարկան, լավ կլիներ այնտեղ ևս ունենալ աստղադիտակ:
«Մենք գտնում ենք, որ տեղափոխումն ավելի ճիշտ տարբերակ է, որովհետև այն ոչ միայն ուսումնական նպատակի կծառայի, այլև բաց կլինի զբոսաշրջիկների, հանրության լայն շրջանակների համար և կդառնա նաև Ստեփանակերտի տեսարժան վայրերից մեկը: Ցանկացողները հնարավորություն կունենան ծանոթանալ աստղադիտակ սարքի և դրա միջոցով իրականացվող աշխատանքներին»,-նշել է Ա. Միքայելյանը:
Նա տեղեկացրել է նաև, որ Արցախի դպրոցականների համար նախատեսվում է կազմակերպել «Իմ տիեզերք» վերնագրով շարադրությունների մրցույթ: Մրցութային տեղեր գրաված աշակերտները կայցելել Բյուրականի աստղադիտարան և հանդիպումներ կունենան հայ անվանի գիտանականների հետ:
Բյուրականի աստղագետներն ԱրՊՀ-ում և Ստեփանակերտի դպրոցներում հանդես են եկել նաև դասախոսություններով:
Ա. Միքայելյանն ասել է նաև, որ Արցախում շատ տաղանդավոր երեխաներ կան, և ինքը վստահ է, որ այդ աշակերտների մոտ ցանկություն կառաջանա դառնալ աստղագետներ:
Նշենք, որ Արցախի հանրակրթական դպրոցների 9-րդ դասարանում է ընդամենը մի բաժին հատկացված աստղագիտությանը: