Այսօր՝ ապրիլի 19-ին, տեղի է ունեցել ԱՀ Ազգային ժողովի 7-րդ նստաշրջանի հերթական լիագումար նիստը, որին ներկա էր 30 պատգամավոր:
Խորհրդարանի այսօրվա նիստում ամենամյա զեկույցով հանդես է եկել Հանրապետության Նախագահը
ՍՏԵՓԱՆԱԿԵՐՏ, ապրիլի 19, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ նիստին բացման խոսքով հանդես է եկել ԱԺ նախագահ Աշոտ Ղուլյանը՝ նշելով, որ ԱՀ նոր Սահմանադրության դրույթների մեծ մասն արդեն ուժի մեջ է և կիրառվում է բազմաթիվ ոլորտներում:
«Այդուհանդերձ, հաշվի առնելով, որ 2017 թվականի փետրվարի 20-ի սահմանադրական հանրաքվեից հետո 2018 թ.-ը առաջին ամբողջական տարին է, կան սահմանադրական որոշ կարգավորումներ, որոնք պետք է կիրառվեն առաջին անգամ՝ գործողության մեջ դնելով իշխանության թևերի միջև հարաբերությունների կանոնակարգմանը վերաբերող դրույթները: Նոր Սահմանադրության համաձայն՝ Հանրապետության Նախագահը առաջին անգամ է Ազգային ժողովին ներկայացնում նախորդ տարվա ծրագրի կատարման ընթացքի և արդյունքների, ինչպես նաև հաջորդ տարվա ծրագրի վերաբերյալ ամենամյա զեկույց: ԱՀ մշտական հանձնաժողովներում շարունակվել են քննարկումները շրջանառության մեջ դրված մի քանի օրինագծերի շուրջ, և դրանց արդյունքում հանձնաժողովները դրական եզրակացություններ են տվել՝ առաջարկելով այդ նախագծերը քննության առնել խորհրդարանի լիագումար նիստում»,- նշել է Ա. Ղուլյանը:
Համաձայն նիստի օրակարգի՝ հանրապետության նախագահ Բակո Սահակյանը ներկայացրել է նախորդ տարվա ծրագրի կատարման ընթացքի և արդյունքների, ինչպես նաև հաջորդ տարվա ծրագրի վերաբերյալ զեկույց:
Նախագահը կարևորել է պաշտպանության, արտաքին քաղաքականության, սոցիալ-տնտեսական, դատաիրավական և պետական կառավարման ոլորտները՝ ընդգծելով, որ կատարվել է մեծ աշխատանք, և արդյունքները տեսանելի են:
Այնուհետև, ըստ օրակարգի, պատգամավորների կողմից հնչեցվել են հարցեր՝ ուղղված հանրապետության նախագահին և կառավարության անդամներին:
Ի դեպ, Ազգային ժողովի այսօրվա նիստում փակ գաղտնի քվեարկության արդյունքում Գերագույն դատարանի դատավոր է նշանակվել Հասմիկ Խաչատրյանը:
«Հանրային ծառայության մասին» ԼՂՀ օրենքում լրացում կատարելու մասին, ինչպես նաև «Պետական պաշտոններ զբաղեցնող անձանց վարձատրության մասին» ԼՂՀ օրենքում փոփոխություններ և լրացումներ կատարելու մասին օրենքների նախագծերը ներկայացրել է ԱԺ պատգամավոր Արսեն Առստամյանը:
Իսկ օրենսդրական՝ «Առևտրաարդյունաբերական պալատի մասին» նախագիծը ներկայացրել է ԱՀ էկոնոմիկայի, արտադրական ենթակառուցվածքների նախարարի տեղակալ Տիգրան Թորոսյանը:
Նիստի վերջում պատգամավորական հայտարարությամբ հանդես են եկել «Վերածնունդ» խմբակցության ղեկավար Հայկ Խանումյանը և «Դաշնակցություն» խմբակցության պատգամավոր Դավիթ Իշխանյանը:
