ԱՀ կրթության, գիտության և սպորտի նախարարության նախաձեռնությամբ անցկացվող սպարտակիադա մարզական միջոցառումների շրջանակում այսօր Ստեփանակերտի N 6 դպրոցի մարզադահլիճում հանրակրթական դպրոցների 8-12-րդ դասարանների աշակերտների ընդգրկմամբ մեկնարկել է հանդբոլի մրցումների քաղաքային փուլը. այն տևելու է մինչև մայիսի 19-ը:
Ստեփանակերտում մեկնարկել է սպարտակիադայի քաղաքային փուլը
ՍՏԵՓԱՆԱԿԵՐՏ, մայիսի 15, ԱՐՑԱԽՊՐԵՍ: «Արցախպրես»-ի թղթակցի հետ զրույցում մարզական միջոցառման գլխավոր մրցավար Վարդգես Մխիթարյանն ասել է, որ սպարտակիադային հանդբոլ մարզաձևից Ստեփանակերտի հանրակրթական դպրոցներից մասնակցում է 6 թիմ՝ 11-ական մասնակիցներով:
Մեր զրուցակցի խոսքով՝ սպարտակիադայի նպատակն է դաստիարակել ֆիզիկապես կոփված երիտասարդներ, աշակերտների շրջանում բարելավել ֆիզիկական պատրաստվածության աստիճանը, ամրապնդել մատաղ սերնդի առողջությունը, ինչպես նաև բարձր դասարանների աշակերտներին ներգրավել մարզական միջոցառումների:
Սպարտակիադայի քաղաքային փուլում առաջնակարգ տեղեր գրաված թիմերը պարգևատրվելու են դիպլոմներով և դրամական պարգևներով:
Նշենք նաև, որ սպարտակիադան անց է կացվում 3 փուլով՝ ներդպրոցական, շրջանային (քաղաքային) և հանրապետական: