Այսօր՝ մայիսի 24-ին, Շուշիում մեկնարկել է Ամերիկայի Հայ իրավաբանական միության (Armenian Bar Association) տարեկան համաժողովը՝ ԱՄՆ-ից և Կանադայից ժամանած իրավաբանների մասնակցությամբ։
Շուշիում մեկնարկել է Ամերիկայի Հայ իրավաբանական միության տարեկան համաժողովը (տեսանյութ)
ՍՏԵՓԱՆԱԿԵՐՏ, մայիսի 24, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ համաժողովին բացման խոսքով հանդես է եկել ԱՀ Մարդու իրավունքների պաշտպան Ռուբեն Մելիքյանը՝ կարևորելով, որ համաժողովն Արցախում անցկացնելը նպատակ ունի կապեր հաստատել Սփյուռքի գործընկերների հետ:
«Անցյալ տարի Կալիֆոռնիայում մասնակցեցի Ամերիկայի Հայ իրավաբանական միության հերթական տարեկան ժողովին: Այդ ժամանակ առաջ եկավ հաջորդ տարեկան ժողովն Արցախում անցկացնելու մասին գաղափարը: Նախորդ համաժողովին մենք ներկայացրինք Արցախում մարդու իրավունքների պաշտպանությանն առնչվող հարցեր, ինչն էլ հանգեցրեց մի շարք նախաձեռնություններ իրականացնելու անհրաժեշտությանը՝ համագործակցությունը տարբեր ուղղություններով ամրապնդելու նպատակով: Ներկայումս միության երկու անդամներ իրենց արտադրական փորձուսուցումն են անցնում Արցախում՝ համաժողովի շնորհիվ էլ ավելի շոշափելի դարձնելով իրենց ծավալած գործունեությունն ու այդ համատեքստում մեր համագործակցությունը»,- ավելացրել է Ռ. Մելիքյանը:
Ամերիկայի Հայ իրավաբանական միության ատենապետ Սարո Քըրքոնյանն էլ նշել է, որ իրենց միության նպատակներից մեկն էլ այժմ դարձել է Արցախի ճանաչումը միջազգային կառույցների կողմից:
«Արցախում իրականացված ծրագրերից հարկ է նշել Արցախի պետական համալսարանում ստեղծված իրավաբանական կլինիկայի ստեղծումը, որի շնորհիվ մարդիկ կարող են անվճար խորհրդատվություններ ստանալ: Անշուշտ, մենք ուզում ենք օգտակար լինել և մեր մասնակցությունն ունենալ մարդու իրավունքների պաշտպանության հետ կապված հարցերում: Անհրաժեշտությունը մեծ է, և մենք դրանում համոզվեցինք ապրիլյան պատերազմի օրերին»,- ասել է Ս. Քըրքոնյանը:
Ամերիկայի Հայ իրավաբանական միության ատենապետն Արցախի ճանաչման հարցում կարևորել է նաև Ստեփանակերտի օդանավակայանի գործունեության հարցը՝ ընդգծելով, որ վերջինիս չօգտագործումը մեծ վնաս է հասցնում, և այն կարող է դիտվել՝ որպես տնտեսական առավելություն Արցախի Հանրապետության համար:
Կարևորելով նախաձեռնությունը՝ Ամերիկայի Հայ իրավաբանական միության քարտուղար Վանա Գիտցինյանը նշել է, որ համաժողովի հիմնական թեման մարդու իրավունքների պաշտպանությունն է:
Նա ընդգծել է, որ պետք է պաշտպանել հայերի իրավուքները ԱՄՆ-ում, Հայաստանում և Արցախում՝ չմոռանալով Արցախի անկախության, ուրիշ նահանգների հետ հարաբերությունները զարգացնելուն ուղղված հարցերի կարևորությունը:
Համաժողովն իր աշխատանքները շարունակելու է նաև վաղը: