Նախօրեին Հադրութի շրջանի Մեծ Թաղեր և Տումի համայնքներում արձանագրված գայլի հարձակման հետևանքով մարմնական վնասվածք ստացած երեք անչափահաս երեխաները, ինչպես արդեն տեղեկացրել ենք, գտնվում են Ստեփանակերտի «Արևիկ» մանկական բուժմիավորումում:
Գայլի հարձակման հետևանքով տուժածների մասին նոր մանրամասներ
ՍՏԵՓԱՆԱԿԵՐՏ, մայիսի 29, ԱՐՑԱԽՊՐԵՍ: Ինչպես «Արցախպրես»-ին տեղեկացրին ԱՀ առողջապահության նախարարությունից՝ անչափահասներից 2008թ. Մեծ Թաղեր գյուղում ծնված Տիգրան Խաչատուրի Խամփերյանը ընդունվել է ազդրի միջին երրորդականի՝ գայլի կծած վերքերով:
2014թ. Մեծ Թաղեր գյուղում ծնված Արինա Վալերիկի Մարգարյանը ընդունվել է դեմքի և գլխի մազածածկ շրջանի՝ գայլի կծած վերքերով: 2000թ. Տումի գյուղում ծնված Կամո Կառլենի Գասպարյանն ընդունվել է դեմքի և աջ սրունքի միջին երրորդականի՝ գայլի կծած վերքերով: Նույն միջադեպի հետևանքով՝ ԱՀ առողջապահության նախարարության Հադրութի շրջանային բուժմիավորում է դիմել 1977թ. Տումի գյուղում ծնված Լյովա Սուրենի Արզումանյանը՝ աջ վերին վերջույթի թաթի դրսային մակերեսի քերծված վերքերով:
Աղբյուրի հաղորդմամբ՝ տուժածներին ցուցաբերվել է վերքերի առաջնային վիրաբուժական մշակում, ներարկվել է միանվագ հակափայտացման անատոքսին, ինչպես նաև հակակատաղության պատվաստանյութ, որը կշարունակվի իրականացվել համաձայն ուղեցույցերի` ըստ ժամանակացույցի: Ի դեպ, մասնագետներն առաջ են քաշում այն վարկածը, որ երկու գյուղերում էլ բնակիչների վրա հարձակվել է նույն գայլը, որն արդեն ոչնչացվել է:
