Ստեփանակերտի քաղաքապետարանի և ԱՀ կրթության, գիտության և սպորտի նախարարության համատեղ նախաձեռնությամբ հունիսի 1-ին՝ երեխաների իրավունքների պաշտպանության միջազգային օրվան նվիրված, մայրաքաղաքում տեղի է ունեցել տոնական միջոցառում:
Ստեփանակերտում մեծ շուքով նշում են Երեխաների պաշտպանության միջազգային օրը (տեսանյութ)
ՍՏԵՓԱՆԱԿԵՐՏ, հունիսի 1, ԱՐՑԱԽՊՐԵՍ: Տոնի կապակցությամբ մայրաքաղաքի Վերածննդիհրապարակում կազմակերպվել են «Խաղաղությունը երեխաների աչքերով» խորագրով նկարչություն՝ ջրաներկով և գունավոր մատիտներով, ակվագրիմ, հանդիպում մուլտհերոսների հետ, բաբլ ֆուտբոլ հետաքրքիր խաղ:
Միջոցառմանը Ստեփանակերտի մանկապարտեզների երեխաների մասնակցությամբ կազմակերպվել է շքերթ: Երեխաները հանդես են եկել ազգագրական և այլ պարերի կատարմամբ. համերգը եզրափակվել է միասնության շուրջպարով:
«Արցախպրես»-ի թղթակցի հետ զրույցում ԱՀ կրթության, գիտության և սպորտի նախարար Նարինե Աղաբալյանն ասել է, որ Հունիսի 1-ը տոն է բոլորի համար, ինչի կապակցությամբ ինքը շնորհավորում է թե՛ փոքրիկներին և թե՛ մեծերին: Նա երեխաներին մաղթել է խաղաղություն, անհոգ մանկություն, որ նրանք ունենան ապահով և երջանիկ մանկություն:«Մենք ունենք շնորհալի, տաղանդաշատ երեխաներ: Պետք է հոգանք, որ նրանց համար ստեղծվեն պայմաններ: Այսօրվա մեր սերունդը շատ արագ է ինտեգրվում միջազգային տեղեկատվությանը: Համացանցի շնորհիվ արցախցի փոքրիկները կարողանում են հաղորդակից լինել այն ամենին, ինչը հասանելի է զարգացած երկրների երեխաներին»,-նշել է Ն. Աղաբալյանը:
Ստեփանակերտի քաղաքապետ Սուրեն Գրիգորյանն էլ, խոսելով տոնի մասին, ասել է, որ, տարաբնույթ միջոցառումներ կազմակերպելով, իրենք փորձում են տոնական տրամադրություն հաղորդել փոքրիկներին:
Նա ևս շնորհավորել է աշխարհի բոլոր փոքրիկներին, հատկապես՝ արցախցի մանուկներին՝ ցանկանալով, որ նրանք մեծանան ջինջ ու պայծառ երկնքի տակ:
«Մեր իշխանություններն անելու են ամեն ինչ, որ մեր բալիկները միշտ ուրախ լինեն, առողջ մեծանան և ապագայում դառնան Արցախի արժանի քաղաքցիներ»,-նշել է քաղաքապետը:
Վերածննդի հրապարակում փոքրիկների հետ ունեցած մեր զրույցներից պարզ է դարձել, որ նրանք տեղեկացված են Երեխաների պաշտպանության միջազգային օրվա մասին: Մանուկներն իրար շնորհավորական խոսքեր են ուղղել՝ մաղթելով միմյանց պարզ ու անկեղծ խոսքեր. նրանք անկաշկանդ արտասանել են ոտանավորներ:
Նշենք, որ Երեխաների պաշտպանության միջազգային օրը նշվում է ամեն տարի հունիսի 1-ին. այն հաստատվել է 1949 թվականին, Կանանց միջազգային դեմոկրատական ֆեդերացիայի կողմից, Փարիզում։
