ՍՏԵՓԱՆԱԿԵՐՏ, հունիսի 7, ԱՐՑԱԽՊՐԵՍ: Այս  մասին   «Արցախպրես»-ի   թղթակցի    հետ  զրույցում  ասել  է   Ջիվան  Ավետիսյանը:

Նրա    խոսքով՝      իր    հետ   Արցախում  են   Ֆիլմի   նկարահանման    հիմնական   կազմը, այդ  թվում՝  լիտվացի    բեմադրող   օպերատորը:

Խոսելով   տարվող  աշխատանքների  մասին՝  Ջ.  Ավետիսյանն  ասել է, որ  ներկայումս  ֆիլմի   նկարչական  թիմն  Ասկերանի   շրջանի  Հարավ  գյուղում    պատրաստում է  նկարահանումների տեղանքները՝ կառուցելով ֆիլմի տեսարաններին համապատասխան էքստերիերները և ինտերիերները: Իսկ օպերատորական թիմը ռեժիսորի հետ աշխատում է ֆիլմի կադրավորումների վրա: Հարավ  գյուղում  արդեն   պատրաստ   են  մի   շարք   դեկորացիաներ:

Առաջիկա մեկ ամսվա ընթացքում, իրենք զբաղվելու են նաև ֆիլմում քաղաքացիների հավաքագրմամբ՝ ովքեր ցանկություն կունենան մասնակցել  ֆիլմի նկարահանումներին։

«Ֆիլմի  նկարահանումներն  ավարտվելու  են   օգոստոսի    վերջին: Իսկ   սեպտեմբերից   ֆիլմի      աշխատանքները   կշարունակվեն      Եվրոպայում: Ֆիլմն ամբողջությամբ   կավարտենք  2019  թվականի   գարնանը:

«Դրախտի  դարպաս»-ում նկարահանվում  են    օտարերկրյա  հայտնի   դերասաններ  Լիտվայից, Ֆրանսիայից, ԱՄՆ-ից, որոնց թվում է նաև Ֆիլմի  գլխավոր  հերոսուհի Տատյանա Սպիվակովան, ինչպես նաև Նյու Յորքում  ապրող   մեր  հայրենակցուհի  Նաիրա  Զաքարյանը»,- ավելացրել  է  Ջ.  Ավետիսյանը:

Ըստ   կինոռեժիսորի՝   ֆիլմը  մարդու  մասին  է, պատերազմական  լրագրողի,  ով  իր   կյանքի  ընթացքում  թույլ  է  տվել մի  սխալ,  որն  իրեն  տանջում  է     ողջ   կյանքի   ընթացքում:  Ֆիլմի   դեպքերը   տեղի  են  ունենում ապրիլյան  քառօրյա   պատերազմի  օրերին, որտեղ     առկա   են    ռոմանտիզմն  ու   դրամատիզմը, մարդկային  հոգեկան    աշխարհի   խնդիրները:

Ջ.  Ավետիսյանն ընդգծել է նաև, որ ֆիլմի նպատակը՝  Արցախը միջազգային  հարթակներում   ճանաչելի   դարձնելն  է: 

Ֆիլմի  նկարահանումներին    աջակցում  են   ԱՀ  կառավարությունը,   ԱՀ  մշակույթի, երիտասարդության   հարցերի   և  զբոսաշրջության   նախարարությունը, ԱՄՆ-ում գործող «Artsakh Arts and Cultural Foundation»-ը:

Ըստ  ընթացիկ տարվա  մայիսի 2-ին ԱՀ մշակույթի, երիտասարդության հարցերի, զբոսաշրջության նախարար Սերգեյ Շահվերդյանի և «Ֆիշ Այ Արթ» մշակութային հիմնադրամի տնօրեն Ջիվան Ավետիսյանի միջև կնքված  համագործակցության հուշագրի՝  հիմք  է  դրվել  բացառապես   արդյունավետ, կառուցողական  և   ճիշտ  աշխատանքի   ձև, որը     բավականին   մեծ  ազդեցություն  է  ունենալու   «Դրախտի  դարպասը»   ֆիլմի  նկարահանումների  վրա:

Ջ. Ավետիսյանը   նշել  է   նաև, որ  Հայաստանի  ազգային    կինոկենտրոնի   աջակցությունը   ևս  շատ  կարևոր  է ֆիլմի  համար, որն  իրենք, ցավոք,  մինչ  այսօր դեռևս  չունեն: 

Արցախում   գտնվող   «Artsakh Arts and Cultural Foundation»-ի  հիմնադիր  Գարո  Մադենլյանն  էլ    մեզ  հետ  զրույցում   ասել  է, որ   իրենք    շարունակում  են   աջակցել    Ջիվան  Ավետիսյանի      ֆիլմերի   նկարահանումներին:

Նա   նշել  է, որ ավելի վաղ,  ԱՄՆ-ում՝ «Ալեքս» կինոթատրոնում, «Artsakh Arts and Cultural Foundation»-ի շնորհիվ կազմակերպվել էր  «Վերջին բնակիչը» ֆիլմի ցուցադրությունը:

Խոսելով     «Դրախտի  դարպասը»    ֆիլմի      աջակցության  մասին՝   մեր  զրուցակիցն  ավելացրել է, որ   իրենք խոստացել   են   50   հազար   դոլար    տրամադրել  Ջ. Ավետիսյանի   ֆիլմի    նկարահանման   համար: 

«ԱՄՆ-ում մի   շարք     միջոցառումներ  ենք   շարունակում  իրականացնել, որոնց  ժամանակ   հավաքագրված    գումարները  ևս   կուղղվեն    ֆիլմի  նկարահանումներին»,-ասել   է  Գ. Մադենլիանը:

Անդրադառնալով   Ջ. Ավետիսյանի    նկարահանած    ֆիլմերին՝    Գ. Մադենլյանն   ասել է, որ,   դրանք     բավականին  բարձր   մակարդակով  են   ներկայացված: 

Ըստ   Գ. Մեդինլյանի՝   կինոռեժիսորն   իր   ստեղծած   ֆիլմերով  կարողանում  է      աշխարհին  ներկայացնել  Արցախը, նրա հերոսական   պատմությունը:

Ջ.  Ավետիսյանի    Ֆիլմերով  Արցախը   ճանաչելի    և  հասու  է   դառնում    աշխարհին: