Մայիսի 30-ից մինչև հունիսի 5-ը Ռուսաստանի Դաշնության Անապա քաղաքում ընթացել է քիք բոքսինգի աշխարհի գավաթի խաղարկություն, որին մասնակցել է նաև արցախցի 4 մարզիկ:
Քիք բոքսինգի աշխարհի գավաթի խաղարկությունից արցախցի մարզիկները վերադարձել են մեդալներով
ՍՏԵՓԱՆԱԿԵՐՏ, հունիսի 8, ԱՐՑԱԽՊՐԵՍ: «Արցախպրես»-ի թղթակցի հետ զրույցում Արցախի ավանդական քիք-բոքսինգի ֆեդերացիայի փոխնախագահ, Անապա մեկնած Ստեփանակերտի մանկապատանեկան մարզադպրոցի մարզիչ Արմեն Ղահրամանյանն ասել է, որ արցախցի մարզիկներն առաջին անգամ են մասնակցում քիք բոքսինգի աշխարհի գավաթի խաղարկությանը:
Նրա խոսքով՝ 57կգ քաշային կարգում Արեն Հակոբյանը և 63.5 կգ քաշայինում՝ Հարություն Գալստյանը գրավել են 2-րդ տեղեր՝ արժանանալով արծաթե մեդալների և պատվոգրերի: Իսկ 60կգ քաշային կարգում Իգոր Հարությունյանը և 63,5 կգ քաշայինում՝ Հրաչյա Համբարձումյանն էլ գրավել են 3-րդ տեղեր՝ արժանանալով բրոնզե մեդալների և պատվոգրերի:
Ա. Ղահրամանյանը բավարար է գնահատել խաղարկության արդյունքները և հույս հայտնել, որ հաջորդ անգամ իրենք աշխատելու են ևս գրավել մրցանակային տեղեր:
