ԱՀ մշակույթի, երիտասարդության հարցերիև և զբոսաշրջության նախարարության նախաձեռնությամբ Արցախի պետական համալսարանում այսօր կայացել է գիտաժողով՝ նվիրված Մխիթարյան միաբանության 300-ամյակին:
ԱրՊՀ-ում կայացել է գիտաժողով՝ նվիրված Մխիթարյան միաբանության 300-ամյակին
ՍՏԵՓԱՆԱԿԵՐՏ, հունիսի 8, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ գիտաժողովին ելույթներով հանդես են եկել Արցախի պետական պատմաերկրագիտական թանգարանի տնօրեն Մելանյա Բալայանը և Վենետիկի Մխիթարյան միաբանության պատվիրակության անդամները: Նրանք իրենց ելույթներում անդրադարձել են Մխիթար Սեբաստացու գործունեությանը, վերջինիս կողմից Վենետիկի Մխիթարյան միաբանությունը Սուրբ Ղազար կղզում հիմնադրելու և այնտեղ մշակութային, կրթական գործունեություն ծավալելու մասին:
Միջոցառման ընթացքում առաջին անգամ ցուցադրվել է նաև «Հայ գիրք» վերնագրով ֆիլմ՝ նվիրված Մխիթար Սեբաստացու գործունեությանը:
Գիտաժողովին Արցախի պետական պատմաերկրագիտական թանգարանի տնօրեն Մելանյա Բալայանն ասել է, որ Մխիթարյան միաբանության Արցախ գալը մեծ պատիվ է:
Նա նշել է, որ Վենետիկի Մխիթարյան միաբանությունն աշխարհասփյուռ հայությանը գիտական ուժը միացնող յուրօրինակ կենտրոն է:
«Մխիթարյան միաբանության կատարած հայրենանվեր ու ազգանվեր գործունեությունը բազմաբովանդակ ու հարուստ է: Երախտագիտությամբ եմ ուզում նշել, որ միաբանության հիմնադրմամբ՝ 1701 թվականից ի վեր, հայ ժողովրդի կյանքում իրականացրել է կրթական, գիտական և հոգևոր շատ կարևոր գործունեություն: Մխիթարյան միաբանության անդամներն իրենց ուսումնասիրություններում մեծ տեղ են տալիս պատմական Հայաստանին: Իսկ Մխիթարյան միաբանության երախտավորներից Ղևոնդ Ալիշանն իր ուսումնասիրություններում մի շարք է նվիրել Ուտիքին և Արցախին, ցույց տալով, որ այդ երկրամասերը փոխկապակցված են միմյանց: Այսօր, դժբախտաբար, մշտապես խոսում են Արցախի մասին, մի կողմ թողնելով մեր կորուսյալ Ուտիքը, որը գտնվում է Ադրբեջանի տարածքում»,-ավելացրել է Մ. Բալայանը:
Վենետիկի Ս. Ղազար կղզու վանահայր Հայր Սերոբ Չամուրլյանն էլ ասել է, որ իր համար մեծ պատիվ է ազատ, անկախ Արցախում մասնակցել Մխիթարյան միաբանության 300-ամյակին նվիրված գիտաժողովին:
Նա իր ելույթում մանրամասն ներկայացրել է, թե ինչպես է Մխիթար Սեբաստացին առաջին անգամ ոտք դնելով Ս. Ղազար կղզի՝ հիմնել Մխիթարյան միաբանությունը:
«Մխիթար Սեբաստացին 1700 թվականին Կոստանդնուպոլսում վանական հաստատություն է հիմնել: Որոշ հանգամանքների պատճառով 1701 թվականին նա ստիպված է եղել իր աշակերտների հետ ապաստանել Հունսատանի Մեթոն բերդաքաղաքում, որն այն ժամանակ պատկանում էր Վենետիկի Հանրապետությանը, իսկ 1715 թվականին թուրք-վենետիկյան պատերազմի պատճառով հանգրվանել է Վենետիկում: 1717 թվականին Վենետիկի իշխանությունները թույլատրել են Մխիթար Սեբաստացուն վերջնականապես հաստատվել Ս. Ղազար կղզում: Մխիթար Վարդապետն իր միաբանությունը հիմնել է հայ ժողովրդի հոգևոր և իմացական լուսավորության համար: Այս գիտակցությունն ու հավատքն են եղել Սեբաստացու կյանքի հիմնական նպատկն ու երազանքը: Մխիթար Սեբաստացու մահից հետո հաստատությունը կրել է «Մխիթարյան միաբանություն» անվանումը»,- մասնավորապես ասել է Հայր Սերոբ Չամուրլյանը:
Գիտաժողովին ելույթներով հանդես են եկել նաև Վենետիկի Մխիթարյան միաբանության պատվիրակության այլ անդամները, որոնք ևս կարևորել են Մխիթարյան միաբանության գործունեությունը, ինչպես նաև ներկայացրել հայազգի գործիչներին, հայագիտության երախտավորներին, որոնք կարևոր դերակատարություն են ունեցել նաև հայ մշակույթը աշխարհին ներկայացնելու համար:
Գիտաժողովին ներկա էին Արցախի թեմի առաջնորդ Պարգև արքեպիսկոպոս Մարտիրոսյանը, համալսարանի պրոֆեսորադասախոսական կազմը, ուսանողներ, հյուրեր և այլք:
