ՍՏԵՓԱՆԱԿԵՐՏ, հունիսի 12, ԱՐՑԱԽՊՐԵՍ:Համերգի  ընթացքում   քոլեջի  սաները    նվագել  են  ժողովրդական  գործիքներով, ինչպես  նաև   հանդես  եկել    երգերով:

«Արցախպրես»-ի  թղթակցի     հետ   զրույցում   Սայաթ-Նովայի անվան  երաժշտական   քոլեջի   տնօրեն    Կարինե   Դադամյանն   պատմել  է, որ   կառույցը  գործում  է  1961  թվակնից, իսկ   2014  թվականին   շենքը  կապիտալ   վերանորոգվել  է  մոսկվայաբնակ   հայազգի   բարերար  Արմեն  Շահազիզյանի  և   «Հայաստան»   համահայկական  հիմնադրամի   համաֆինանսավորմամբ:

Մեր  զրուցակցի   խոսքով՝   քոլեջում    գործում  են  դաշնամուրի,  փողային,  լարային և ժողովրդական   գործիքների, ինչպես  նաև    խմբավարական, էստրադային  երաժշտարվեստի, երգեցողության,  երաժշտական   տեսության    բաժիններ:

«Քոլեջը  2017-2018  թվականներին    ունեցել  է 131   ուսանող. նրանց  թիվը  տարեցտարի  ավելանում  է: Այս  տարի   ունեցել  ենք     26   շրջանավարտ, որոնցից   6-ը   ուսումը  շարունակելու են    Երևանի  Կոմիտասի   անվան   երաժշտական-պետական   կոնսերվատորիայում: Քոլեջի   սաները    պարբերաբար     մասնակցում  են     տարբեր  միջազգային  մրցույթների»,-ավելացրել  է  Կ. Դադամյանը:

Խոսելով  խնդիրների   մասին՝   Կ.  Դադամյանը  նաև    ասել է, որ  իրենց  քոլեջը  երաժշտական   գործիքների   կարիք  ունի,  մասնավորապես՝  դաշնամուրի, ակորդեոնի,  թառի:

Միջոցառմանը    ներկա  էին  ԱՀ  մշակույթի, երիտասարդության  հարցերի  և   զբոսաշրջության  նախարար  Սերգեյ  Շահվերդյանը, ԱՀ   կրթության, գիտության  և  սպորտի  նախարար  Նարինե  Աղաբալյանը, արվեստասեր  հասարակությունը  և  այլք: