Artsakhpress

Քաղաքական

Արցախի ժողովուրդը քաղաքական ինքնագիտակցության բարձր մակարդակ ունի. Դավիթ Բաբայան

Արցախում տեղի ունեցած վերջին իրադարձությունները շատ հետաքրքիր են, սակայն դրանց գնահատման համար անհրաժեշտ է գործընթացները խորապես հասկանալ:

Արցախի ժողովուրդը քաղաքական ինքնագիտակցության բարձր մակարդակ ունի. Դավիթ Բաբայան

Արցախի ժողովուրդը քաղաքական ինքնագիտակցության բարձր մակարդակ ունի. Դավիթ Բաբայան

ՍՏԵՓԱՆԱԿԵՐՏ, հունիսի 14, ԱՐՑԱԽՊՐԵՍ: Այս մասին NEWS.am-ի հետ զրույցում ասաց Արցախի նախագահի մամուլի քարտուղար Դավիթ Բաբայանը:
Նրա խոսքով՝ իրավիճակն անհրաժեշտ է դիտարկել 3 հարթությունում՝ իրավական, պետականաշինության եւ ներքաղաքական ոլորտներ, պայքարի մարտավարություն եւ ռազմավարություն: «Իրավական տեսանկյունից իրադարձությունները հաստատում են, որ Արցախը կայացած պետություն է, որտեղ երաշխավորված են քաղաքացիների խոսքի եւ ընտրության ազատության իրավունքները: Չնայած թվաքանակին՝ մի քանի տասնյակ կամ նույնիսկ մեկ մարդ, կարող են բողոքի ցույցեր կազմակերպել, պահանջել նախագահի հրաժարական: Հարցը ցուցարարների թիվը չէ: Բոլոր ցույցերը կարգավորելի են, եթե դրանք, բնականաբար, անցնում են օրենքի շրջանակում: Արցախում ժողովրդավարական ինստիտուտները լիակատար աշխատում են»,- հայտարարեց Դավիթ Բաբայանը:
Պետականաշինության տեսանկյունից իրադարձությունները ցուցադրում են օրենքի գերակայությունը, շարունակեց Դավիթ Բաբայանը: «Ոչ ոք իրեն օրենքից վեր դասել չի կարող: Բոլորը պետք է օրենքը հարգեն: Սա պետության ուժն է: Իսկ Արցախն ամբողջ հայության հպարտությունն է»,- նշեց նա:
«Ինչ վերաբերում է ներքաղաքական պայքարին, մարտավարությանն ու ռազմավարությանը, ապա ակնհայտ է, որ ուժեր կան, որոնք չեն կարողանում համբերել մինչեւ 2020 թվականը: Ոմանք փորձում են իրավիճակը տատանել: Հարցը բուն պահանջները չեն, այլ այն, թե ինչու են բարձրաձայնվում հիմա: Արցախի նախագահ Բակո Սահակյանը մի քանի օր առաջ լրատվամիջոցների հետ զրույցում ասաց, որ մտադիր չէ 2020 թվականին առաջադրվել: Սկզբունքորեն այլ կերպ չէր էլ կարող լինել: Սակայն սա որոշակի ուժերի ոտքերի տակի հողը սասանում է: Նրանց ամբողջ պայքարը կառուցվում է գործող իշխանությունների քննադատության վրա: Ղարաբաղի ժողովուրդը շատ բան կարող է  ներել, սակայն չի ների օրենքի խախտումը եւ անարդարությունը: Եթե խախտում չկա, ապա այս ուժերը բողոքարկելու բան էլ չունեն, բացակայում է նախադրյալը, որ քաղաքական դիվիդենտներ վաստակեն: Սա գիտակցելով՝ նրանք փորձում են հիմա պահանջներ ներկայացնել»,- նշեց Դավիթ Բաբայանը: Նա, միաժամանակ, շեշտեց, որ Արցախի ժողովուրդը քաղաքական բարձր ինքնագիտակցություն ունի եւ չի դիմի իրավիճակի շահարկումների ու տատանման:
Հիշեցնենք, որ բողոքի ցույցերի պատճառը ԱԱԾ աշխատակցի հետ տեղի ունեցած միջադեպն էր: Ինչպես պնդում են լավատեղյակ մարմինները, միջադեպը կենցաղային բնույթ է ունեցել:

     

Քաղաքական

Տնտեսական

Հասարակական

Ռազմական

Ամենադիտված

ամիս

շաբաթ

օր