Արցախի էկոնոմիկայի և արտադրական ենթակառուցվածքների և ԱՀ մշակույթի, երիտասարդության հարցերի և զբոսաշրջության նախարարությունների, «Յելլ Էքսթրիմ Պարկ» («Yell Extreme Park») նախագծի, «Սքայ Քլաբ-Պարագլայդինգ ին Արմենիա»-ի («Paragliding in Armenia – SKY CLUB») և «Սքայբոլ» (Skyball) ընկերության համատեղ նախաձեռնությամբ վաղը՝ հունիսի 16-ին, Ստեփանակերտի օդանավակայանում տեղի է ունենալու «Արցախ Էյր Ֆեստ» (Artshakh Air Fest) երկրորդ փառատոնը:
Ստեփանակերտում տեղի ունենալիք օդային փառատոնին նախատեսվում են հետաքրքիր ծրագրեր
ՍՏԵՓԱՆԱԿԵՐՏ, հունիսի 15, ԱՐՑԱԽՊՐԵՍ: «Արցախպրես»-ի թղթակցի հետ զրույցում ԱՀ էկոնոմիկայի և արտադրական ենթակառուցվածքների նախարարության մամլո պատասխանատու Մերի Ղազարյանն ասել է, որ «Արցախ Էյր Ֆեստ» փառատոնի նպատակն է Արցախում զարգացնել զբոսաշրջության ոլորտը, բարձրացնել տեղեկացվածությունն Արցախի թեթև ավիացիայի ներուժի մասին, աշխուժացնել երիտասարդական կյանքը, նպաստել երիտասարդության ազատ ժամանցի և առողջ ապրելակերպի կազմակերպմանն ու խրախուսել հետաքրքիր բիզնես նախագծերի իրականացում:
Նա նշել է, որ Ստեփանակերտի օդանավակայանում վաղը՝ ժամը 14:00-ից ինքնաթիռների և օդապարիկների մասնակցությամբ կմեկնարկի օդային շոու: Ժամը 16:30-ին նախատեսվում է մամուլի ասուլիս, որի հիմնական խոսնակներն են լինելու ԱՀ Էկոնոմիկայի և արտադրական ենթակառուցվածքների նախարար Լևոն Գրիգորյանը, ԱՀ Մշակույթի, երիտասարդության հարցերի և զբոսաշրջության նախարարության զբոսաշրջության վարչության պետ Արտակ Գրիգորյանը և «Յելլ Էքսթրիմ Պարկ» նախագծի հեղինակ, համահիմնադիր Տիգրան Չիբուխչյանը:
«Ժամը 17:30-ից սկսած՝ ներկաները պարապլանով, օդապարիկով և արցախյան տուրիստական երկտեղանի ինքնաթիռով թռչելու հնարավորություն են ունենալու:
Ժամը 18:30-ին միջոցառմանը համերգային ծրագրով հանդես կգան Գոռ Սուջյանը, «Նեմրա» ռոք խումբը, Շուշվա բենդը, Միքայել Ոսկանյանը և ընկերներ խումբը, իսկ 21:00-ին էլ «DJ» Գուեվոյի մասնակցությամբ նախատեսվում է փարթի»,-տեղեկացրել է Մ. Ղազարյանը:
Նրա խոսքով՝ «Արցախ Էյր Ֆեստ»-ն ամենասպասված և ամենաշատ էներգիայով, լավ տրամադրություններով լի միջոցառումն է Արցախում. այն 2017 թվականին հյուրընկալել էր ավելի քան 2000 մասնակից, իսկ 2018-ին անկնալվող մասնակիցների քանակությունը 5000 է:
Տեղեկացնենք, որ փառատոնին մասնակցելու համար մուտքի տոմսի արժեքը 2000 դրամ է:
