Ստեփանակերտի Շառլ Ազնավուրի անվան մշակույթի կենտրոնի սաները հանդես են եկել 2017-2018 ուսումնական տարվա հաշվետու համերգով:
Շառլ Ազնավուրի անվան մշակույթի կենտրոնը թողարկել է 13 շրջանավարտ (լուսանկարներ)
ՍՏԵՓԱՆԱԿԵՐՏ, հունիսի 16, ԱՐՑԱԽՊՐԵՍ: Համերգի ընթացքում կենտրոնի սաները հանդես են եկել հայկական և արտասահմանյան երգ ու պարերով: Միջոցառման ընթացքում Շառլ Ազնավուրի անվան մշակույթի կենտրոնի 13 շրջանավարտ ստացել է վկայական:
«Արցախպրես»-ի թղթակցի հետ զրույցում կենտրոնի տնօրեն Արմեն Հովսեփյանն ասել է, որ իրենց կառույցը գործում է 2006 թվականից: Կրթօջախում անվճար հիմունքներով սովորում է 171 սան, իսկ վճարովի՝ 60:
«Մշակույթի կենտրոնում գործում է պարային և վոկալ բաժիններ. սաների մեծամասնությունը հաճախում է պարի: Տարվա կտրվածքով համերգային ծրագրեր ենք ունենում Արցախի տարբեր շրջաններում և զորամասերում»,-նշել է տնօրենը:
Ըստ Ա. Հովսեփյանի՝ ցանկություն կա կենտրոնի լավագույն շրջանավարտներին կատարելագործել և ստեղծել մշակութային նոր խումբ:
Խոսելով խնդիրների մասին՝ կենտրոնի տնօրենն ասել է, որ շենքը վերանորոգման կարիք ունի:
Մեր զրուցակիցը տեղեկացրել է նաև, որ ԱՀ մշակույթի, երիտասարդության հարցերի և զբոսաշրջության նախարարության կողմից կրթօջախի սաների համար պատվիրվելու է 48 պարային հագուստ:
Տեղեկացնենք, որ կենտրոնն օգոստոսի 20-ից սկսում է ընդունելություն. դիմել կարող են 5 տարեկանից սկսած: Ուսման տևողությունն էլ 5 տարի է:
