Artsakhpress

Մշակույթ

Արցախում կայացել է օդային երկրորդ փառատոնը(տեսանյութ)

Այսօր՝ հունիսի 16-ին, Ստեփանակերտի օդանավակայանում կազմակերպվել է օդային երկրորդ փառատոնը:

Արցախում կայացել է օդային երկրորդ փառատոնը(տեսանյութ)

Արցախում կայացել է օդային երկրորդ փառատոնը(տեսանյութ)
ՍՏԵՓԱՆԱԿԵՐՏ, հունիսի 16, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ «Յելլ Էքստրիմ Պարկ» («Yell Extreme Park») ընկերության կողմից նախաձեռնված, ԱՀ էկոնոմիկայի և արտադրական ենթակառուցվածքների, մշակույթի, երիտասարդության հարցերի և զբոսաշրջության նախարարությունների, «Սքայ Քլաբ-Պարագլայդինգ ին Արմենիա»-ի («Paragliding in Armenia – SKY CLUB») և «Սքայբոլ»-ի («Skyball») համատեղ ջանքերով իրականացվող «Արցախ էյր ֆեստ» («Artshakh Air Fest») փառատոնը, չնայած այսօր տեղացած հորդառատ անձրևին և եղանակային անբարենպաստ պայմաններին, այնուամենայնիվ, կայացել է՝ մեկնարկելով ինքնաթիռների և օդապարիկների մասնակցությամբ կազմակերպված օդային շոուով:
 
Դրան զուգահեռ՝ սկսվել է նաև համերգային ծրագիրը՝ Գոռ Սուջյանի, «Նեմրա» ռոք խմբի, «Շուշվա բենդ»-ի, «Միքայել Ոսկանյան և ընկերներ» խմբի կատարումներով, որին հաջորդել է փարթին՝ DJ Գուեվոյի մասնակցությամբ:
 
Փառատոնի ընթացքում կազմակերպիչները հանդես են եկել նաև մամուլի ասուլիսով՝ պատասխանելով լրագրողների կողմից հնչեցված մի շարք հարցերի:
 
Մասնավորապես՝  ԱՀ էկոնոմիկայի և արտադրական ենթակառուցվածքների նախարար Լևոն Գրիգորյանը նշել է, որ այսօրվա փառատոնը 2017 թվականին կայացած «Արցախ էյր ֆեստ»-ի շարունակությունն է՝ ավելի մեծ ծավալով:
«Այսօրվա եղանակային պայմանները կարելի է դիտարկել՝ որպես արկածային տուրիզմի մի մաս: Նախատեսված բոլոր թռիչքները տեղի են ունեցել, և կարծում եմ՝ սա հիմք է հետագայում ավելի մեծ միջոցառումներ կազմակերպելու համար: Անցած տարվա համեմատ՝ այսօր կան փոփոխություններ՝ մասնակիցների և ծրագրի առումով: Ցուցադրական թռիչքներից որոշները 2017-ին հնարավորություն չենք ունեցել ներկայացնելու: Միջոցառումն ինքնին հետապնդում է բնակչության ժամանցի կազմակերպման, զբոսաշրջության զարգացման, Արցախում թեթև և փոքր ավիացիայի ներուժի քարոզման և այլ նպատակներ»,- ասել է Լ. Գրիգորյանը:
Նախարարն անդրադարձել է նաև Ստեփանակերտի օդանավակայանի գործունեությանը՝ մանրամասնելով, որ այստեղից թռիչքներ իրականացվում և նախկինում ևս իրականացվել են:
«Կանոնավոր չվերթներ չեն լինում, սակայն դրանց իրականացման համար մենք տեխնիկապես պատրաստ ենք: Մեր հարևան երկիրը ամեն կերպ խոչընդոտում է օդանավակայանի կանոնավոր գործունեությանը: Այս ուղղությամբ մենք աշխատում ենք, և հուսով եմ՝ հետագայում խնդիրը լուծում կստանա: Այսօր ունենք 2 ինքնաթիռ, որոնք նախատեսված են զբոսաշրջային թռիչքների համար»,- ավելացրել է Լ. Գրիգորյանը:
Անդրադառնալով փառատոնին զբոսաշրջիկների մասնակցությանն՝ ԱՀ մշակույթի, երիտասարդության հարցերի և զբոսաշրջության նախարարության զբոսաշրջության վարչության պետ Արտակ Գրիգորյանն ասել է, որ փառատոնը մեծ նշանակություն ունի և այն անցում է ավանդականից ժամանակակիցին:
««Արցախ էյր ֆեստ»-ը դիտարկվում է նաև որպես զբոսաշրջային ներուժի իրացման մեծ միջոց: Այս տարի ևս նկատվում է զբոսաշրջիկների զգալի աճ, որը ողջունելի է: Ինչ վերաբերում է Արցախ այցելող զբոսաշրջիկների աշխարհագրությանն, առհասարակ, ապա նշեմ, որ 2017 թվականի տվյալներով զբոսաշրջիկների մեծ հոսք կար ՌԴ-ից, ԱՄՆ-ից, Ֆրանսիայից, Իրանից և Լիբանանից»,- ավելացրել է Ա. Գրիգորյանը:
 
Իսկ «Յելլ Էքստրիմ Պարկ»-ի համահիմնադիր Տիգրան Չիբուխչյանը նշել է, որ իրենք նախատեսում են այս փառատոնին զուգահեռ՝ կազմակերպել ևս մեկ միջոցառում: Կոնկրետ ժամկետների և նախաձեռնության բնույթի մասին Տ. Չիբուխչյանը կմանրամասնի առաջիկայում:
 
Մամուլի ասուլիսին լրագրողների կողմից հնչեցված հարցերին պատասխանել են նաև «Սքայբոլ»-ի ներկայացուցիչ Նաիրի Բարսեղյանը և «Սքայ Քլաբ-Պարագլայդինգ ին Արմենիա»-ի ներկայացուցիչ Արմեն Սարգսյանը:
 
Նրանք նշել են, որ փառատոնը հնարավորություն է տալիս աշխուժացնել երիտասարդական կյանքը, նպաստել երիտասարդության ազատ ժամացի և առողջ ապրելակերպի կազմակերպմանը:
 
Փառատոնի մասնակից Անգելինա Հակոբյանը, ով առաջին անգամ է ներկա գտնվում «Արցախ էյր ֆեստ»-ին, նշել է, որ այն հնարավորություն է տալիս ավելի մոտիկից ծանոթանալու արկածային տուրիզմին:
 
«Փառատոնի միջավայրը տրամադրող է՝ մարդկանց հետ ծանոթանալու, նոր ընկերներ ձեռք բերելու առումով: Սա հաճելի երևույթ է Արցախում»,- ավելացրել է Ա. Հակոբյանը:
 
Նշենք, որ այսօր փառատոնին նախապես գրանցված մասնակիցները հնարավորություն են ունեցել թռչելու երկտեղանոց տուրիստական ինքնաթիռով: Օդապարիկների տոմսեր գնած մասնակիցներին հետ է վերադարձվել գումարը, քանի որ անձրևի պատճառով թռիչքները չեն կայացել, իսկ պարապլանի համար նախապես գրանցվածները վաղը՝ հունիսի 17-ին, մինչև ժամը 13:00-ն, հնարավորություն կունենան թռչելու Ստեփանակերտի օդանավակայանից:

     

Քաղաքական

Տնտեսական

Հասարակական

Ռազմական

Ամենադիտված

ամիս

շաբաթ

օր

Անչափ ցավալի է, երբ հարցականի տակ են դնում Ռոբերտ Աբաջյանի գիտակցված անձնազոհությունը. Լևոն Մնացականյան

Խուզարկություն է կատարվել իմ հայրական տանը, «Մետաքսկոմբինատում» և Տողի «Նոր Կյանք» ջրաշխարհում. Արթուր Աղաբեկյանը հանդես է եկել հայտարարությամբ

Արցախի կառավարության օպերատիվ շտաբի անդամների հայտարարությունը՝ Արթուր Աղաբեկյանի տան խուզարկության առթիվ

Արցախ այցելած զբոսաշրջիկների թիվն աճել է 102 տոկոսով

Շնագայլի հարձակման հերթական դեպքն է արձանագրվել

Արթուր Աղաբեկյանը բաց նամակ է հղել ապրիլյան պատերազմի ժամանակ ստեղծված օպերատիվ շտաբի անդամներին

Սամվել Շահրամանյանը նշանակվել է գերիների, պատանդների եւ անհայտ կորածների հարցերով հանձնաժողովի նախագահ

Հաթերքում կկայանա «Ժենգյալով հացի փառատոն». մանրամասներ է հաղորդում կազմակերպիչը

Հադրութում քաղաքացին «Ֆագոտ» տիպի հակատանկային համալիր է գտել

Search