ՍՏԵՓԱՆԱԿԵՐՏ, հունիսի 18, ԱՐՑԱԽՊՐԵՍ: ‹‹Արցախպրես››-ի թղթակցի հաղորդմամբ՝ կամուրջն անցնում է Հունոտի կիրճի արգելոցի տարածքից դեպի «Զոնտիկներ» տանող ճանապարհով:

Իր խոսքում ‹‹ԱՀԱ Արմենիա››-ի ներկայացուցիչ Գևորգ Գասպարյանն ասել է, որ կախովի կամուրջի կառուցումն առաջին հերթին լուծում է անվտանգության խնդիրը, քանի որ նախորդն այդքան էլ հուսալի չէր:

‹‹Ամեն ինչ սկսվեց Թելմա Ալթունի՝ անցյալ տարվա վազքից, երբ նա հասել էր Հունոտի կիրճ և հազիվ էր անցել կամուրջի վրայով: Դրանից հետո նա խոստացավ, որ այդ հարցը կլուծվի: Արդյունքում Թելմա Ալթունի մարաթոնից գոյացած ողջ հասույթի տրամադրմամբ և ‹‹ԱՀԱ Արմենիա››-ի ջանքերի շնորհիվ այսօր ունենք նոր կամուրջ: Սա մեկնարկն է իրականացվող նախագծի, քանի որ մենք պլանավորում ենք այս արահետի՝ Շուշի-Քարին տակ հատվածում կառուցել 3 կամուրջ: Կատարված աշխատանքի արդյունքում արահետն ամբողջությամբ բարեկարգվել է:

Աշխատել ենք մոտ 15 օր: Ամենադժվարը թերևս այն էր, որ աշխատանքների մեկնարկի առաջին իսկ օրվանից անձրև էր տեղում: Դժվարանցանելի մասերը փոխվել են, կառուցվել են նոր արահետներ: Աշխատանքներն ամբողջությամբ կավարտվեն մոտ 1-2 ամսվա ընթացքում՝ այդ կերպ լուծելով ոչ միայն կամուրջների, այլև արահետների դժվարանցանելիության հարցը››,- ավելացրել է Գ. Գասպարյանը:

‹‹Հայ լեռնագնացների ընկերակցության›› Լոս Անջելեսից կամավոր Ռոբերտ Ասարյանն էլ նշել է, որ մեծագույն սիրով և նվիրումով են ամեն անգամ ոտք դնում Արցախի հողում:

 

«Արցախը մեր տունն է: Մենք կառուցում ենք մեր տունը և շարունակելու ենք այդ նվիրական գործը››,- ասել է Ռ. Ասարյանը:

 

Իսկ ԱՀ մշակույթի, երիտասարդության հարցերի և զբոսաշրջության նախարար Սերգեյ Շահվերդյանը, շնորհակալություն հայտնելով նախաձեռնության կազմակերպիչներին, ընդգծել է, որ Հունոտի կիրճը վայր է, որը համալրում է Շուշիի ճարտարապետական հարստությունները:

 

‹‹Սա բնապատմական արգելոց է և ամբողջացնում է համալիրը: Անշուշտ, որքան բարեկարգվում է արգելոցը, այնքան ավելանում է զբոսաշրջիկների թիվը, և անհրաժեշտություն է առաջանում ներդնելու ավելի մեծ ռեսուրսներ››,- նշել է Ս. Շահվերդյանը:

 

Բացմանը ներկա էին ‹‹ԱՀԱ Արմենիա››-ի ավելի քան 40 անդամներ, զբոսաշրջիկներ, հյուրեր: